Gituldokan sa San Miguel Beermen ang ilang kampanya sa elimination round pinaagi sa mahinungdanong kadaugan batok sa Meralco Bolts, 115-110, sa main game niadtong Sabado, Marso 5, 2022, sa Philippine Basketball Association (PBA) Governor’s Cup sa Smart Araneta Coliseum.
Sa kasamtangan, ang Beermen anaa sa ikatulong dapit sa standing dala ang 7-4 nga rekord apan bisan pa niini, wala pa sila nakaseguro nga makabaton og twice-to-beat nga bintaha sa quarter-finals nga ihatag ngadto sa top four human sa elimination round.
Hinuon sa ilang kasamtangang posisyon, dakodako ang poruhan sa Beermen nga masulod sa top four apan wala na kini sa ilang mga kamot ug mag-agad na lang sila sa resulta sa nahabiling mga duwa.
Nagbangis og maayo ang import sa Beermen nga si Shabazz Muhammad ug nagpakatap kini’g 57 puntos ug 19 rebounds aron pangulohan ang kadaugan samtang nidugang og 16 puntos ang Sugboanong higante nga si JuneMar Fajardo.
Ang Bolts nahagbong sa 6-4 nga rekord apan aduna pa sila’y nahabiling usa ka duwa.
Sa premirong duwa, buhi pa ang paglaom sa NorthPort Batang Pier nga makakumpayot og usa ka puwesto sa quarter-finals human nila gipangbuntog ang Terrafirma Dyip, 124-117.
Ang Batang Pier ningsaka sa ikasiyam nga puwesto dala ang 5-5 nga rekord.
Ang Dyip, nga usa sa teams nga wala na’y paglaom nga makaabante sa sunod round, natagak sa 2-8 nga rekord.