Milanat og duha ka oras nga pagkombate sa mga sakop sa bombero sa sunog nga niigo sa merkado publiko sa Barangay Poblacion sa lungsod sa Anda, lalawigan sa Bohol kagahapon sa kaadlawon, Marso 6.
Si Police Corporal Kenji Amora sa Anda Police Station nibutyag sa Superbalita Cebu nga alas 4:00 sa kaadlawon nadawat sa kabomberohan ang tawag sa sunog ug nitubag dayon sila sa alarma.
Pagka alas 6:20 sa buntag, nadeklarar nga kontrolado na ang kayo.
Sa pagka alas 7:00 sa buntag, gideklarar sa kabomberohan nga fire out na.
Tulo ka mga stall sa merkdao ang hingpit nasunog nga namaligya og dry goods nga usa sa hinungdan nga dugay napawong ang kayo.
Matod ni Amora, subay sa pag-imbestigar sa Anda Fire Station nga nagsugod ang pag-ulbo sa kayo sa tindahan nga gipanag-iya ni Evelyn Castro Angot nga daling mikatap sa iyang tapad.
Dugang ni Amora, ang gitubag nga sunog sa kabomberohan gisaka sa third alarm.
Moabot sa P5 milyones ang gibanabana sa kabomberohan nga danyos sa pagkasunog sa tulo ka tindahan.
Si SFO 2 John-jhon Joy Remedios, hepe sa Anda Fire Station nga nahinabi sa Superbalita Cebu, nipasabot nga tungod sa giayo pa ang ilang fire truck, ang mga bombero sa lungsod sa Guindulman, Bohol nga pinakaduol ug uban pang mga silingang lungsod ang miresponde sa nasunog nga merkado.
Dugang ni Remedios nga daghang anggulo ang ilang gitan-aw nga posibleng hinungdan sa sunog. Una mao ang kuryente human dunay niingon nga tungod sa overloaded na ang mga gipangpansak, samtang duna pud ilang nakuha nga butane ang posibleng rason.
Nagpadayon pa ang ilang imbestigasyon.