Ang Fire Prevention Month matag Marso maoy tinuig nga nasudnong kalihukan sa Bureau of Fire Protection (BFP) sa pag-edukar sa katawhan bahin sa kaluwasan sa sunog.
Samtang ning buwana, ang BFP kasagaran motala og daghang kaso sa sunog.
Kabahin niini, ang Cebu City Fire Office (CCFO) niadto sa Barangay Agsungot nga bukirang dapit sa dakbayan sa Sugbo kagahapon, Marso 6, dili aron pagtubag og sunog kondili ang paghatag og desente nga balay sa labing kabus sa nahisgutang barangay subay sa programa sa BFP nga “Gasa sa Gugma, Pabahay Project.”
Si FCInsp. Josephus Alburo, fire marshal sa Cebu City, nihimo sa maong lakang sa pagtabang sa pamilya nga labing kabus nga napilian sa CCFO.
Matod ni SFO2 Wendell Villanueva, tigpamaba sa CCFO, ang maong panimalay nga gihatag hinimo sa kahoy ug semento nga dunay gidak-on nga 14.44 metro kwadrado.
Dugang ni Villanueva nga nagkantidad ang maong panimalay sa P100,000 nga ilang kwarta nga mao unta ang ilang igasto sa ilang party niadtong Disyembre 2021, apan tungod sa bagyong Odette wala kini mahinayon.
“Among nauyonan nga among ihatag nalang sa kadtong nabiktima. Ang tanang mga substation gipapangita sa among hepe og mga biktima sa Odette, kadtong naguba gyud ang balay. Mao na nga ang Talamban Fire Station ang napilian kay ang Barangay Agsungot sa Talamban mana nga sakop,” matod ni Villanueva.
Dugang niini nga ang napilian nga magtiayon mao sila si Edgar Listujas ug Girlie Pason nga dunay duha ka mga anak, kansang balay naguba sa bagyong Odette.
Kini ang unang higayon nga ang CCFO nihatag og balay sa biktima sa bagyo.