Patay ang managsilingan human ang ilang motorsiklo nga gisakyan nabanggaan sa SUV nga gimaneho sa usa ka pulis alas 2:35 sa kaadlawon sa Dominggo, Marso 6, sa national road sa Barangay Dunggoan, dakbayan sa Danao.
Ang mga biktima mao sila si Wharlyn J. Toledo, 20, taga Barangay Taytay, Danao ug nagmaneho sa Honda Beat ug ang iyang angkas nga si Gilbert Amit, 26, taga Brgy. Taytay, Danao.
Samtang ang nakabangga nga Toyota Fortuner nga dunay plate no. S3 1049 nga gimaneho ni Police Senior Master Sgt. Steeve Book, 40, sakop sa Tabogon Police Station nga gitanggong na sa kapulisan sa Danao.
Sumala sa mga pulis sa Danao, dead-on-arrival (DOA) ang duha ka mga biktima sa tambalanan sa Danao.
Si Police Master Sgt. Ronald Gomez, traffic investigator sa Danao nga nahinabi sa Superbalita Cebu, nagkanayon nga ang mga biktima gikan sa lungsod sa Carmen ug kusog nga nakapadagan samtang padulong na mopauli sa Danao.
Gikasugat nila ang Fortuner nga gimaneho ni Book diin sakay niini ang mga higala gikan sa dakbayan sa Mandaue ug padulong na usab mopauli sa Tabogon.
Matod ni Gomez, si Book nibutyag nga kalit kaayo ang panghitabo pag-abot sa nahisgutang dapit.
Suwaw ang suga dihang nasugatan nila ang mga biktima sa paglihay niya, naigo ang motorsiklo.
Gumikan sa kakusog sa impact, ang mga biktima nangalagpot sa ilang gisakyang motorsiklo.
Tungod sa grabeng kadaot sa ilang mga ulo ug lawas, nabugtoan sa kinabuhi ang duha dihang nadangat sa tambalanan sa Danao.
Sumala ni Gomez karong adlawa, Marso 7, ilang ipasaka ang tukmang kaso batok sa pulis.
Gipadayag ni Gomez nga depende hinuon sa matag habig kon magkasabot sila sa korte.