Dili mominos sa P13.3 milyunes ang danyos sa duha ka sunodsunod nga sunog sa dakbayan sa Sugbo kagahapon sa hapon, Marso 6, 2022.
Unang alarma gitubag sa mga sakop sa bombero sa Salinas Drive Extension sa Barangay Lahug sa alas 3:45 sa hapon.
Si FO2 Fulbert Navarro, duty fire investigator sa Cebu City Fire Office (CCFO), nagkanayon nga nagsugod ang sunog sa panimalay sa usa ka Renato Diaz.
Matod ni Navarro, walo ka mga balay ang hingpit naugdaw sa maong sunog.
Gisaka sa unang alarma ang sunog sa alas 3:48 sa hapon ug pagka alas 4:05 sa hapon, nakontrolar ang pag-ulbo sa kayo ug siyam ka minuto ang nakalabay, gideklarar nga fire out na.
Matod ni Navarro, moabot og P3.7 milyunes ang danyos sa nahitabong sunog sa Lahug apan wala pa matino kon unsa ang hinungdan sa pag-ulbo sa kayo.
Samtang kapin sa usa ka oras ang nakalabay, laing alarma ang gitubag sa mga bombero sa Sityo Inahan sa Kanunayng Panabang sa Barangay San Antonio ug kini nagsugod sa panimalay sa usa ka Vicente Reston.
Ubang bombero nga naglimpiyo pa sa mga tipaka sa sunog sa Lahug, daling nidagan na usab sa Barangay San Antonio.
Si Navarro nibutyag nga ang sunog sa San Antonio nadawat nila alas 5:13 sa hapon.
Ang pag-ulbo sa sunog sa San Antonio gisaka dayon sa unang alarma sa alas 5:18 sa hapon ug nakontrolar sa alas 5:49 sa hapon ug pipila ka minutos ang nakalabay, gideklarar nga napawong ang kayo.
Dugang ni Navarro, moabot sa 15 ka mga balay ang naugdaw nunot na sa dali nga pagkatap sa kayo ug ang danyos gibanabana nga P9.6 milyunes.
Matod ni Navarro, ang sunog nga ilang gialarmahan sa Lahug padayon pa ang pag-imbestigar niini samtang ang sa San Antonio, dunay nakuha nga kasayuran si Navarro nga giingong dunay nagluto og sud-an nga wala mabantayi nga maoy rason sa pagkatap sa kayo.
Apan giklaro ni Navarro nga ila pa kining susihon kon unsay nahitabo sa dali nga pag-ulbo sa sunog.
Walay kinabuhi nga nakalas sa duha ka mga sunog.
Ang sunodsunod nga sunog nahitabo samtang giobserbar ang National Fire Prevention Month diin ang kabomberohan nag-atiman sa daghang kalihokan bahin sa edukasyon sa pagsanta sa sunog.
Lakip sa kalihokan sa Bureau of Fire Protection (BFP) ang paghatag og hinabang ug pagpakabana sa katilingban.