Lima ka mga gikatahapang drug pusher, tulo kanila babaye, nasikop sa sunodsunod nga mga buy-bust sa Dominggo, Marso 6, sa buntag ug hapon sa dakbayan sa Carcar.
Unang buy-bust sa alas 11:30 sa buntag sa Sitio Nangkaan, Barangay Perrelos diin nasikop si Ella Jean Hitgano Estrera, 24, dalaga, taga Basak, dakbayan sa Sugbo, naa sa watchlist sa kapulisan.
Nakuha gikan sa iyang posisyon ang duha ka mga putos sa gituohang shabu ug P500 nga buy-bust money.
Ikaduhang buy-bust operation gipahigayon sa alas 11:35 sa buntag sa Sitio Nangkaan, Barangay Perrelos.
Napusasan sila si John Paul Ornopia, 26, ulitawo, taga Dumlog, dakbayan sa Talisay, naa gihapon sa watchlist ug kakunsabo nga si Roxsamae Indiola Alicante, 30, taga Sitio San Isidro, Barangay Perrelos.
Si Police Lt. Col. Ardioleto Cabagnot, hepe sa Carcar Police Station nga nahinabi sa Superbalita Cebu, nagkanayon nga nasubay nila ang duha human sa ilang mga nag-unang anti-drug operations.
Matud ni Cabagnot, nakuhaan nila og 10 ka putos sa gituohang shabu, P500 buy-bust money ug gidiling drugas nga mobalor og P5,100 si Ornopia.
Pagka alas 3:30 sa hapon sa samang adlaw, laing gikatahapang drug pusher nasikop sa Sitio Cambuntan, Barangay Bolinawan, Carcar City.
Ang suspek nga giilang si Gerric Labis Bacalso, 28, ulitawo, nagpuyo sa nahisgutang lugar, naa sa watchlist sa kapulisan.
Nakuha gikan sa iyang posisyon ang unom ka mga putos sa gituohang shabu nga mobalor og P 2,040.
Laing gikatahapang drug pusher nasikop sa alas 5:30 sa hapon sa Sitio Tagbilaran, Barangay Bolinawan.
Napusasan si Mylene Ortega Indiola, 29, dalaga, naa sa watchlist ug nakuhaan og upat ka putos sa gituohang shabu nga mobalor og P1,224.