“Kini nga teyorya maoy gigamit sa mga politiko mao nga nindot kaayo ang ilang mga saad panahon sa kampanya.”
USA sa among gihisgutan sa klase ang Public Choice Theory sa ekonomista nga si James Buchanan nga dunay kalambigitan sa lakat sa politika sa atong nasud.
Ang teyorya naglantugi nga ang ekonomikanhon nga interest maoy driving force sa politika. Giingon nga ang tawo moboto sa usa ka kandidato nga ilang gituohan nga mohatag kanila og akses sa kuwarta.
Buot ipasabot, kung ang kandidato mopromisa nga iyang kontrolon ang druga o kaha wagtangon ang buhis sa mga minimum wage earners, ang yanong katawhan makabenepisyo niini mao nga ila kining iboto.
Kung ang kandidato mopromisa nga iyang tas-an ang buluhisan, di kaayo mohangop niini ang mga gagmay nga negusyante.
Ning maong teyorya, ang relasyon sa botante ug ilang kaugalingon nga interes maoy magtukmod sa paglambigit sa tanang politikal nga kalihukan, di lamang sa pagboto, apan sa fund raising, pag-lobby ug pag-organisa sa mga katawhan sa komunidad.
Kini nga teyorya maoy gigamit sa mga politiko mao nga nindot kaayo ang ilang mga saad panahon sa kampanya. Gawas sa ilang mga plata porma de gobyerno, wala ug tuo sab ang ilang pagpanghatag bugas, odong ug tinapa sa mga tawo.
Ang pait pa niini, patas-anay sila sa palit sa boto sa mga tawo.
Di pa kontento ang uban, ila pang dauton ang ilang kontra sama sa nahitabo sa Davao del Norte ug uban pang mga probinsiya.
Ang administrasyon usab naningkamot aron di gyud modaug ang kandidato sa oposisyon.
Ning bag-o lamang, ang Department of Interior and Local Government (DILG) nagbahad nga ilang ipaguwa sa publiko ang mga pangalan sa narco-politicians taliwala sa kampanya.
Tungod niini, daghan ang gikuyawan kay basin kalit lang mogawas ang ilang pangalan sa narco-list.
Ang uban nabalaka nga basin maigo niini ang mga kandidato nga kontra sa administrasyon mao nga niingon ang opisyal sa Commission on Elections (Comelec) nga di kini makatarunganon sanglit mawad-an og higayon ang giakusahan nga depensahan ang kaugalingon sa korte.
Mao ni ang ngil-ad sa politika sa atong nasud tungod kay ipaagi sa dinautay o hulga ang pagpangampanya. Nindot unta kung ang mga politiko mangampanya pinaagi sa paglatid sa ilang mga political agenda nga nagtumong sa ekonomikanhon nga interes sa tawo aron sila iboto.
Busa, alang sa atong mga igsuon nga botante, atong ibase ang pagpili og kandidato sa ilang mga plata porma nga makapalambo sa ekonomiya sa atong nasud.