"SUNOD nga presidente sa Pilipinas angayang dili moyukbo sa China."
Kini ang sentimento ni retired Supreme Court Justice Antonio Carpio sa usa ka virtual international conference kabahin sa importansya sa seguridad sa nasod human niulbo ang gubat sa Europe gumikan sa pagpanulong sa Russia sa Ukraine nga iyang silingan.
Gihatagan og gibug-aton sa kanhi mahistrado sa Korte Suprema nga ang sunod mapili nga presidente sa nasud kinahanglan nga mopatuman sa makasaysayanong kadaugan sa Pilipinas sa Permanent Court of Arbitration sa United Nations Convention on the Law of the Sea (UNCLOS) batok sa China kalabot sa West Philippine Sea.
Matod ni Carpio nga base sa mga survey labi na sa Social Weather Stations (SWS) sukad pa niadtong tuig 2016, 80 porsyento sa mga Pilipino gusto nga ipatuman ang arbitral ruling ug ang tanang isda, lana, ug uban pang mineral nga nasulod sa 200 nautical mile exclusive economic zone sa West Philippine Sea gipanag-iya sa Pilipinas.
Ang tanang kandidato sa pagka-Presidente sa Mayo 2022 nga eleksiyon nag-ingon nga ilang paluyohan ang hukom sa Hague, gawas kang Ferdinand “Bongbong” Marcos, Jr.
Mao usab kini ang panglantaw ni Presidente Rodrigo Duterte sa hukom sa Hague. Sukad sa 2016, ang pagdagsang sa mga barkong Chinese maritime militia nagpadayon sa Hope ug Julian Felipe reefs nga iya sa nasud.
Isip usa sa mga delegasyon sa nasud ngadto sa Permanent Court of Arbitration, gihimakak ni Carpio nga wala gidungog ang habig sa China sa arbitral tribunal.
Matud ni Carpio, isip partido sa United Nations Convention on the Law of the Sea (UNCLOS) nagpadala ang China sa ilang position paper niadtong higayona.
Ang kanhi mahistrado nidugang nga hapit tanang gamhanang nasud sa kalibutan uyon sa hukom sa UNCLOS,l ug ang China ra ang wala motuman niini.
Buot ni Carpio nga malamdagan ang mga kandidato sa pagka-presidente sa Mayo 9, 2022 nga eleksiyon bahin sa nagkadaiyang hagit sa seguridad ug kaugalingnan sa nasud, ilabi na nga hinayhinay nang nagpakita og kusog ang China ug Russia sa rehiyon. (PAC)