SAMA sa panultion, dili babag ang kalisdanan sa pagkab-ot sa pangandoy kon adunay determinasyon, kakugi ug sakripisyo.
Gipaambit sa 24 anyos nga Mechanical Engineering board 2nd placer Mark Allen Armenion sa dyLA Cebu Newsbreak ang iyang pait nga kaagi sa kinabuhi samtang siya nagtungha pa.
Ang inahan ni Armenion manindahay og uling sa Carbon Market, Cebu City samtang ang iyang amahan mangihaway ug manglitsonay og baboy.
Buwag ang iyang mga gininakan ug siya maoy kamanghuran sa upat ka mga managsuon.
Gumikan sa problemang pinansiyal, wa magdahom si Armenion – taga Warwick Barrack, Carbon Market, nga makatapos sa iyang pagtungha.
HAGBONG SA KLASE
“Abi nako og di ko makahuman tungod sa daghang kalisdanan,” matod pa ni Armenion sa dihang nahinabi sa sibyaanang dyLA.
Iyang gisaysay nga gumikan sa problemang pinansiyal ug sa iyang pamilya, nagpunay siya og palta sa klase resulta nga nahagbong siya sa elementary ug high school.
Nahuman ni Armenion ang iyang elementary sa Mandaue City Central Elementary School.
Sa high school, aduna siyay hagbong sa Mandaue City Comprehensive National High School atol sa iyang pagka-3rd year ug sa Tipolo National High School siya nitiwas.
NAGKARGADOR
Tungod sa kalisod, napugos siya nga magkargador og tubig sa merkado gikan sa iyang pagka-elementary ngadto na sa high school.
Nitungha si Armenion sa University of Cebu – Lapu-Lapu Mandaue ug sa iyang pag-2nd year nag-working student aron makamenus sa tuition.
Laing pagsuway ang nitumaw sa dihang ang gipuy-an ni Armenion nga balay sa Mandaue City gi-demolish hinungdan nga nibalik siya sa iyang inahan sa Carbon Market ug nipadayon sa iyang pagtuon sa University of Cebu-Main Campus.
ACHIEVER
Taliwala sa dagkong mga grado nga nakuha ni Armenion, wa siya naka-qualify isip Cum Laude sa dihang nitapos sa iyang kursong Mechanical Engineering niadtong 2020 kay siya transferee.
Apan daghan siyag achievements: National Quiz Champion sa PSME quiz bowl sa 2018, ug regional champion sa 2018, 2019, Cesafi Math quiz bowl champion 2018, 2019 ug Best in Math sab siya niadtong high school pa lang.
Niangkon si Armenion nga ang pagkuha sa Top 1 maoy iyang puntarya atol sa ME licensure exams.
“Actually mixed emotions jud, Sir. Naay kaguol gamay kay I was expecting na maging number 1. I was confident kasi of my answers sa exam since almost 2 years napod ko nag prepare sa board. Wala jud koy lain aim, kundi to break the record tong highest ME rating sa history,” sigun pa ni Armenion sa samang interbyu.
Laing naghatag og kadasig ni Armenion nga mamahimong topnotcher mao ang cash incentives nga ihatag sa tunghaan.
“That was my mindset during my college days. Para if incase di nako ma-beat, sure jud nga mo-land ko sa top list. Driving force to nakong premyo sa UC, and akong main inspiration is akoa jud parents,”dugang ni Armenion.
UC TOP NOTCHERS
Duha ka mga graduwado sa UC ang nalandig sa Top 2 ug 10 sa Mechanical Engineering Licensure Examinations 2022. Gawas ni Armenion nga maoy Top 2 sa rating nga 95.70 percent, si Louie de los Santos maoy Top 10 sa iyang 93.80 percent.
Ang duha ka topnotchers siguradong makakuha og cash incentives gikan kang UC Chancellor Candice Gotianuy ug sa amahan niini nga si UC President Augusto W. Go.
Si Gotianuy, sa usa ka Facebook post, niingon nga ang matag usa kanila ni Armenion ug de los Santos makadawat og cash incentives gikan kaniya ug sa iyang amahan.