Retired nga maestro nanigbas sa silingan

RETIRED teacher nanigbas sa iyang silingan nga amahan ug anak alas 7:30 sa buntag sa Martes, Marso 8, sa Upper Linao, lungsod sa Minglanilla.

Mga biktima giila sa kapulisan nga sila si Ignacio Seniza Gersale, 55, minyo, mag-uuma, kinsa samdan sa iyang wala nga agtang, wala nga suwang ug walang bukton ug si Gabriel,18, kinsa samdan sa walang kamot.

Ang suspek giilang si Raul Valle Esmeralda,70, kinsa samdan sab sa iyang wala nga kamot.

Si Police Staff Sgt. Junyl Ater sa Minglanilla Police Station nga nahinabi sa Superbalita Cebu, nibutyag nga si Esmeralda kalit nga nisulod sa panimalay sa mga Gersale.

Gipamusil niya ang mga sakop sa pamilyang Gersale gamit ang pugakhang hinungdan nga nagkatibuwaag sila sa paggawas sa balay.

Nakapunit si Ignacio og mga bato, iyang gihapak si Esmeralda, apan naabtan siya ug gitigbas.

Ang anak nga si Gabriel nitabang sa iyang amahan mao nga gitigbas sab ni Esmeralda.

Bisan kon nasamdan si Gabriel, nakamaniho pa siya sa pag-ilog sa sundang mao nga iya usab nga gitigbas si Esmeralda.

Ang mga biktima gidali sa pagdala sa Minglanilla District Hospital samtang si Esmeralda nga nasikop sa Talisay City District Hospital gi-admit.

Sumala pa ni Ater nga kasungian sa yuta ang motibo sa krimen.

“Makadaghan na ko naka blotter ani ilang problema. Si Raul, retired teacher, nireklamo sa mga biktima nga dili mamahawa sa iyang yuta,” dugang ni Ater.

Matod pa ni Ater nga si Esmeralda nipadayag nga dugay na siyang nipapahawa sa mga biktima, kinsa nag-uma lang sa ilang luna.

Nagtuo si Ater nga posibling wa na makaagwanta si Esmeralda sa pagpamagahi sa mga biktima, iya na lang gisulong.

Makadaghan na niya gisultihan ang mga Gersale sa pagpahawa, apan wa mopatuo.

Kasong double frustrated homicide ang giandam sa kapulisan nga ipasaka batok kang Esmeralda.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph