Usa ka drayber ug ang iyang uyab nasikop sa drug bust sa Philippine Drug Enforcement Agency (PDEA) 7 sa dalan Guibilondo, Sityo Regla, Barangay Mabolo, siyudad sa Sugbo, pasado alas 12:00 sa kaadlawon, Miyerkules, Marso 9.
Ang nasikop mao si Howard Villajos, 41, taga Sityo Greenside, Barangay Hipodromo, siyudad sa Sugbo ug si Jessie Torregoza, 22, taga Sityo Magtalisay, Barangay Mabolo, siyudad sa Sugbo.
Sumala sa PDEA 7, ang duha manag-uyab.
Si IA1 Jessie Cabutotan, team leader sa PDEA 7, nagkanayon nga nakuha gikan sa manag-uyab ang shabu nga nitimbang og 250 gramos nga balor og P1.7 milyunes base sa street value.
Matud ni Leia Alcantara, tigpamaba sa PDEA 7, tulo ka buwan ang ilang pagpaniid sa kalihukan ni Villajos hangtod nga gilusad ang ilang malampusong buy-bust.
Dugang ni Alcantara nga tungod sa kalapad sa kalihukan sa ilegal nga drugas ni Villajos, makonsiderar siya nga high value individual.
Ang agawon ni Villajos sa illegal drugs inila nga drug lord nga naa sa bilanggoan.