“How time flies.”
Mao ni kon ihulagway sa magtiayong Marlon ug Gladys Gochan ang ilang 10th Anniversary Celebration sa Cebu’s Original Lechon Belly (Colb) niadtong Pebrero 25 nga gipahigayon sa Sarrosa International Hotel and Residential Suites.
Gibalikan sa innovator ug creator sa boneless lechon nga si Marlon ang mga panahon dihang nagsugod pa lang sila ug limitado pa ang ilang resources. Apan sa wa lang palandunga niabot sila og 10 katuig ug nahimo pang `household name’ ang boneless lechon.
Luyo sa mga grabeng pagsuway nga ilang nahiaguman, sama sa African Swine Flu virus, ang pandemya ug niadto lang Disyembre ang Super Bagyong Odette, apan wa gyud sila magpapildi ug mawad-i og paglaum. Kini, matod ni Gladys, tungod sa dako nilang pagsalig sa ilang produkto ug sa ilang mga tawo nga giisip na nilang kapamilya.
Gani, atol sa Service Loyalty Awards dunay mga kawani nga 10 years in service na usab nga timaan sa dako nilang pagsalig sa ilang kompanya.
Sa maong Anniversary Intimate Party daghan sa mga empleyado ang nakadawat og mga pahalipay diin ang uban niini gi-sponsor pa ni Ms. Korina Sanchez. Samtang ang sikat nga komedyanteng si Boobsie Wonderland mao say nag-emcee sa Boneless Lechon Eating Contest sa Parkmall.
Wala silay mga celebrity endorser apan sagad sa ilang mga suki sa Manila mga taga-showbiz nga maoy `avid fan’ kaayo sa boneless lechon nga nahimo nilang higala ug supporter.
Walay katapusan ang pasalamat sa Colb labi na sa ilang mga kustomer nga way puas ang suporta, business partners, franchisees, suppliers ug sa mga empleyado nga giisip nilang bulawanong gasa tanan gikan sa Kahitas-an. Cheers!