USA ka 17 anyos nga lalaki gipusil sa 23-anyos nga silingan nga lalaki tungod sa pangabubho sa alas 6 sa buntag sa Miyerkules, Marso 9, sa Barangay Cawag, lungsod sa Buenavista, Probinsiya sa Bohol.
Apan nakalingkawas ang 17 anyos nga biktima (ngan gipugngan) human nikagar o wa nakabuto ang armas sa suspek nga si Raymond Butal, 23, taga lungsod sa Dagohoy, Bohol.
Si Police Staff Sergeant Daryl Esclamado, desk officer sa Buenavista Police Station, nagkanayon nga si Butal nasuko human ang iyang ‘uyab’ nga menor de edad nga nagsaulog sa iyang adlawng natawhan, giingong ‘sweet’ kaayo sa 17 anyos nga ig-agaw.
Sumala ni Esclamado, ang grupo nag-inom lakip sa menor de edad nga babaye nga uyab ni Butal kay nagsaulog sa adlaw nga natawhan.
Wala makaantos si Butal nga nagtan-aw sa panagsikit sa duha, niuli siya sa ilang balay aron pagkuha og pusil.
Nibalik siya nga nagdala na og tayaon nga .38 kalibreng revolver ug gipusil ang menor de edad nga silingan, apan wala nakabuto ang pusil.
Taliwala sa kaguliyang, ang kapulisan niabot ug ilang naabtan si Butal hinungdan nga nasikop.
Si Butal gitanggong karon sa presinto sa kapulisan sa Buenavista ug gikatakdang pasakaan og kaso nga attempted homicide ug kalapasan sa Commission on Elections (Comelec) gun ban.