Namasangil ang usa ka 14 anyos nga dalagita nga usa ka person with disability (PWD) nga siya gipanamastamasan sa iyang 17 anyos nga classmate sulod sa comfort room (CR) sa usa ka tunghaan sa City of Naga pasado alas 2:00 sa hapon niadtong Mayo 18, 2023.
Gisaysay sa biktima nga si Carol (di tinuod nga ngalan) sa eksklusibong pakighinabi sa XFM Cebu 88.3 ug Superbalita Cebu nga mangihi siya apan kalit lang nisulod ang 17 anyos niya nga classmate ug siya giingong gilugos.
“Gisulod ko og kalit unya gihuboan ko unya gihikaphikap akong _______ unya gipasulod niya ang ________, Sir,” matod ni Carol.
Nibahad, matod pa, nga dili siya pasiyagiton aron walay makabantay kanilang duha.
Matod sa inahan sa biktima nga si Janette (di tinuod nga ngan) nakahibalo na lang sila sa nahitabo human nga usa sa mga ginikanan nipahibawo kanila nga nabaniog na kini sa tunghaan.
Sumala sa inahan sa dalagita nga adunay mga kalihukan ang tunghaan niadtong tungora sa subject nga MAPEH, diin adunay presentasyon, apan wala niapil ang iyang anak ug nagpabilin lang sa lawak.
Dugang sa inahan, ang iyang anak nipaingon sa CR ug gisundan sa classsmate nga nanglimpiyo gawas sa CR niadtong tungura.
Nakita, matod pa, ang maong hitabo sa laing classmate sa duha human nibalik sa classroom aron magkuha sa iyang cellphone.
Nabantayan sa estudyante nga nadugay sa paggawas sa CR ang biktima hinungdan nga giadto na niini ug gitawag.
Matod pa, nigawas ang biktima nga naghilak kay gibastos sa 17 anyos.
Nasayran na lang sa mga ginikanan nga gikumot ang dughan sa ilang anak ug gihilabtan ang pagkababaye niini.
Nidangop na sa National Bureau of Investigation (NBI) ang pamilya samtang napahibalo na usab ang pamunoan sa tunghaan.
Nakumpirmar sa Pink Room sa Vicente Sotto Memorial Medical Center (VSMMC) nga adunay “laceration” sa kinatawo sa biktima.
NANALIPOD
Ang inahan sa suspek nga 17 anyos nga si Melba (ngan gipugngan) nidepensa sa iyang anak nga matod niya wala nihilabot sa biktima.
Matod ni Melba nga kini subay sa pagtug-an sa iyang anak ngadto kaniya nianang buntag sa Mayo 19, 2023 human gipatawag na siya sa principal sa tunghaan.
Ang saysay sa iyang anak ngadto kaniya nga gisumbag, matod pa niini, ang bongbong sa CR sa ilang eskwelahan dihang gihimoan kini og binastos sa iyang mga klasmet.
“Ang akong anak nasuko sa iyang mga klasmet kay gihimoan siya og estorya. Ang akong anak naa na sa gawas sa CR unya ang kanang babaye nisulod na kay nangihi unya na-lock man nang babaye mao to nga gitabangan sa akong anak. Karon kay nakit-an man sila sa usa ka klasmet nila, giduol ang babaye gipangutana kay naghilak man. Unya pagpangutana, gipangutana man nga ‘Naunsa man ka, gikumot imong totoy? Unya niyango-yango man siya,” matod ni Melva.
Gani sa maong panghitabo, ang iyang anak niinsister nga ipaubos sa eksaminasyon ang dalagita aron mahibaloan kon tinuod ba.
Sila si Melba ug ang iyang kapikas wala pa nakahibalo sa resulta sa eksaminasyon.
Samtang gibutyag sa school head nga dali niyang gi-report sa Naga City DepEd Division ang insidente subay sa DO 40, s. 2012 – DepEd Child Protection Policy.
Matod ni Osky (di tinuod niyang ngan) nga human niya nasayran ang hitabo niadtong Mayo 18 sa hapon, iya dayon nga gipatawag ang duha ka mga kampo ug dayon ni-report sa DepEd una sa City Social Welfare and Development Office (CSWDO).
Samtang giisip niya nga isolated case ang maong hitabo ug huwaton na lang nga mahuman ang imbestigasyon.