KAPIN sa 171,700 ka dose sa AstraZeneca vaccine sa Central Visayas batok sa coronavirus disease (Covid-19) nausik sukad niadtong Pebrero 28, 2022.
Kini ang gibutyag ni Dr. Mary Jean Loreche, chief pathologist sa Department of Health sa Central Visayas (DOH 7) ug tigpamaba sa Visayas Vaccination Operations Center (VVOC), atol sa iyang briefing sa Huwebes, Marso 10.
Giingon ni Loreche nga ang labing bag-o nga pagkausik sa bakuna sa AstraZeneca namatikdan pagkahuman sa pag-igo sa Bagyong Odette, diin ang brand hapit na ma-expire niadtong panahona.
Siya usab niingon nga kadaghanan sa mga usik namatikdan pagkahuman sa bagyo, apan dili pa niya mahatag ang eksaktong gidaghanon.
“Nabigyan tayo na mag-eexpire na na hindi naipamigay kasi nga naman nahirapan tayo at we were in a calamity,” siya nipasabot.
Sa Marso 9, mga 10,822,082 ka dose sa bakuna gikan sa lain-laing brand ang nadawat sa Central Visayas, diin 1,962,100 ang dose sa AstraZeneca vaccine.
Si Loreche niingon nga aduna pay 1,453,874 ka mga dose sa mga bakuna nga nahabilin sa Central Visayas o mga 14.4 porsyento gikan sa kinatibuk-ang gidaghanon nga nadawat.
Matod pa ni Loreche nga adunay daghang mga termino sa paghisgot sa pagkausik sa bakuna, lakip na ang wala maablihi nga vials nga wala mahatag tungod sa pagkabuak/buak, expiration, temperature excursion, ug kontaminasyon tungod sa hugaw.
Namatikdan usab niya nga ang pagkausik sa bakuna mahimo nga ipasangil sa pag-usab sa phase, walay sulod nga vial, nawala nga imbentaryo/gikawat, walay proper label, ug pagsuspenso sa lot/batch number sa mga bakuna.
Sa termino sa bukas nga mga vial, si Loreche niingon nga adunay mga bakuna nga underdosage/sobra nga dose, spillage, pag-agos sa dugo, ug depekto nga auto disable syringe.