USA ka foreman sa construction samdan sa buko-buko human gipusil sa iyang silingan nga ex-convict sa Barangay Tugbungan, lungsod sa Consolacion, alas 12:10 sa kaadlawon, Miyerkules, Marso 9.
Si Dicson Castillo, hingkod, minyo, luwas na ang kahimtang sud sa usa ka publikong ospital sa dakbayan sa Sugbo.
Wala pa madakpi ang suspek nga giila lang sa ngalan nga “Mak-Mak”, kanhi nabilanggo sa kaso sa illegal nga drugas.
Si Police Staff Sgt. Arnold Rusiana, hepe sa Consolacion Police Station nga nahinabi sa Superbalita Cebu, nagkanayon nga personal grudge ang motibo sa krimen.
Sumala pa ni Rusiana nga si Castillo nagsakay sa iyang motorsiklo padulong mopauli sa ilang balay.
Gikatahong nag-atang nang daan si Mak-Mak ug sa pag-agi ni Castillo, gipusil siya tumong sa buko-buko.
Nakapangayo og panabang sa mga silingan si Castillo samtang ang suspek dali nga nakasibat.
Si Rusiana nagkanayon nga sila si Castillo ug Mak-Mak nagkabangi dugay na human nagtuo ang suspek nga ang biktima maoy nagtudlo sa mga pulis sa iyang illegal nga kalihukan.
Tungod niini, dihang nakagawas si Mak-Mak, gikatahong nagkalalis gihapon sila sa samang isyu.
Kasong frustrated murder giandam sa kapulisan batok sa suspek.