GUSTO ka ba nga mapalahi na sab ang inyong dining experience?
Inay sud lang sa naandan nga restaurant diha sa mga establisemento, aniay kan-anan nga doblehon ang kalami ug kanindot nga inyong masuwayan.
Sa wala pa makasuroy dinhing dapita, atong dungawon ang kan-anan nga duol sa nahimutangan niadtong mga nagpuyo sa Metro Cebu area.
Ang ‘Dungawan Bistro + Grill’ anaa nagbuntaog sa Lower South Hills, Barangay Tisa, Dakbayan sa Sugbo.
Sa inyong pagpangaon unya sa ilang putahe nga lutong bahay, imo sab nga makita ang ‘breathtaking skyline view.’
Ang maong kan-anan nga nag-umbaw sa bukid, inyong madungaw ang upat ka mga dakbayan sa Metro Cebu nga naglakip sa Cebu City, Mandaue, Lapu-Lapu ug Talisay.
Diin gikuha ang pangalan sa maong kan-anan ‘Dungawan’, kini nagpasabot nga masud-ong o makita ang palibot sa maong dapit.
Niadtong 2015 pa nag-operate ang maong establishment, apan daghan na nga mga selebrasyon ang gipahigayon, sama sa birthday, marriage proposal, anniversary gatherings ug uban pang okasyon.
Gihulagway sab kini nga maghatag og romantic feels alang niadtong adunay mga ‘significant other.’
Dili lang kinan-anay sa ilang lamian nga Filipino cuisine ang ilang gitanyag, aduna sab silay alcoholic drinks ilabi na niadtong gustong mag-unwind sa stress o mag-relax gikan sa ka busy sa trabaho.
Gawas sa pamilya, haom sab ang lugar sa gustong makig-chill sa barkada.
Ang nakapakurat kay aduna silay gitanyag sa ilang cocktails nga Sinovac shots sa tag-P120 ang baso ug kon unsa kining matanga sa imnunon, ‘it’s for you to find out’ apan nakasiguro ko nga dili kini bakuna.
“The pleasure of life are boundless,” sigun pa sa napatik nga tagline sa Dungawan.
Ang Dungawan bukas gikan sa alas 10:30 sa buntag ngadto na sa alas 12:00 sa tungang gabii sa Lunes ngadto na sa Dominggo.
Alang sa dugang kasayuran, mamahimo ninyong i-follow ang ilang Facebook page pinaagi sa pagklik sa link: https://www.facebook.com/dungawanbistrogrill. / Hulagway gikan sa Dungawan FB page