KANHI drayber sa habalhabal ug kargador sa Carbon Public Market napusasan pasado alas 9:00 sa gabii sa Miyerkules, Marso 9, atol sa buy-bust sa Talisay City Police Station sa Barangay Candulawan.
Si Police Lieutenant Elwood Ebona, team leader sa Drug Enforcement Unit (DEU ) sa Talisay City police, maoy nangulo sa buy-bust nga niresulta sa pagkasikop ni Mark Dexter Fernandez, 31, nag-abang og balay sa Barangay Lahug, Dakbayan sa Sugbo.
Si Police Lieutenant Colonel Randy Caballes, hepe sa Talisay City Police Station, niingon nga nilungtad og pipila ka semana ang ilang pag-monitor kang Fernandez hangtod nga ilang giplano ug gilusad ang buy-bust.
Kapin sa usa ka kilo nga shabu ang nasakmit gikan kang Fernandez, mobalor og P6.9 milyunes subay sa street value.
Dugang ni Caballes nga si Fernandez, gawas nga tighatod og drugas, ni-sideline usab kini og pamaligya gawas sa dakbayan sa Sugbo.
Nagtuo usab si Caballes nga lakip nga gihagbungan ni Fernandez ang kasikbit nga mga lungsod tungod kay niabot na man sa Talisay ang suspek.
Samtang, si Police Lieutenant Colonel Mark Gifter Sucalit, deputy provincial director sa Cebu Police Provincial Office (CPPO), nidayeg sa kalampusan sa mga operatiba sa Talisay City Police Station.
Si Sucalit nagtuo nga ang nasakmit nga shabu sa Talisay Police Station kauban sa nasakmit sa kaulohan nga moabot og kapin sa P1 bilyon.
Dugang ni Sucalit nga duna nay niabot nga shabu sa Central Visayas ilabi na sa probinsiya sa Sugbo nga kauban sa nasakmit sa kaulohan tungod kay kining naimbargo sa kapulisan sa Talisay sama og mga putos nga tea bag.
Ang CPPO naniid usab sa ubang personalidad sa negosyo sa gidiling drugas.