TAGUM CITY, Davao del Norte -- Nadakpan ang giingong tighimo og bomba ug laing duha ka babaye nga kaubanan niini adlaw'ng Miyerkules, Marso 9, 2022, sa siyudad.
Sa press release nga gipagula sa 10th Infantry Division, Philippine Army, mga nahisgutan mao sila Victor Rollon, diin dunay daghang alyas nga si alyas Rico Rollon, alyas Go, alyas Pong, ug alyas Migo, gialegar nga usa ka bomb maker sa Komisyong Mindanao (Kommid) ug sa Southern Mindanao Regional Committee (SMRC).
Nasikop sab sa ang duha ka mga babaye nga sila alyas Rye/alyas Rayray, finance officer sa Guerrilla Front 3, Sub-Regional Committee 4, SMRC, ug si alyas Gab/Jilian, giingong usa ka political instructor sa Pulang Bagani Command (PBC), Regional Operations Command (ROC), SMRC.
Sila nangadakpan sa mga sakop sa 1001st Infantry Pag-asa Brigade ug Criminal Investigation and Detection Group (CIDG)-Davao Region subay sa kasaligan nga impormante.
Si Brigadier General Jesus P Durante III, commander sa 1001st Brigade, nagbutyag nga dunay standing warrant of arrest sa kasong murder ug serious illegal detention ang bomb maker nga si Rollon, samtang ang duha wanted sa kasong rebellion and insurrection ug kasong homicide sa Tagum City ug Lupon, Davao Oriental.
Atol sa operasyon, nakuha sa ilang posisyon ang duha ka mga improvised explosive device, usa ka 5.56mm M16 Colt rifle, usa ka cal. 45 pistol ug mga nagkadaiyang mga buhing bala, stethoscope, thermometer, sphygmomanometer, selpon, sim cards ug mga subersibong dokumento.
Ning kasamtangan, gipangkustodiya na sa awtoridad ang mga nahisgutan.