GIPADAYAG sa 7-footer nga si Greg Slaughter ang iyang interes nga moduwa sa Gilas Pilipinas alang sa kampanya niini sa umaabot nga mga kompetisyon.
Sa iyang Instagram post, nagkanayon ang 33 anyos nga produkto sa University of the Visayas (UV) Green Lancers nga kasamtangan siyang nag-training ubos sa paggiya ni National Basketball Association (NBA) scout Gary Boyson aron mas palambuon ang iyang abilidad.
Gi-tag ni Slaughter ang Samahang Basketbol ng Pilipinas (SBP) aron ipabuhagay ang iyang kaandam kon imbitahon siyang moduwa sa Gilas.
“I am available and [have] been working with 16 year NBA champion scout @boysongary. I would love to be included in the national team pools,” pamahayag pa ni Slaughter.
Ang Gilas Pilipinas kasamtangang nangandam alang sa Southeast Asian Games nga ipahigayon karong Mayo, 2022 sa Hanoi, Vietnam.
Nagkanayon si Gilas Pilipinas coach Chot Reyes nga nagplano siyang moporma og 15-man training pool alang sa matag duha ka mga tuig nga kompetisyon.