SUGDAN sa paghatag ang financial assistance alang sa mga senior citizen sa Dakbayan sa Sugbo karong adlawa, Marso 12.
Ang pagpanghatag sa P3,000 nga financial assistance alang sa unang quarter ning tuiga ipahigayon sa mga barangay gym ug tunghaan, gikan sa Marso 12-14.
Matod ni Department of Social Welfare Services (DSWS) head Portia Basmayor sa Biyernes, Marso 11, nga wa gi-house-to-house ang pagpanghatag di sama sa katapusang quarter sa miaging tuig kay ubos na man kaayo ang mga kaso sa coronavirus disease 2019 (Covid-19).
Si Basmayor niingon nga ang mga barangay nagpahibawo na sa mga senior citizen.
Apan di tanang 80,000 ka senior citizens sa Cebu City ang kinahanglang moadto sa ilang barangay gym ug tunghaan.
Matod ni Dr. Ester Concha, special assistant on social services sa Dakbayan, niingon nga ang 22,105 ka mga senior senior citizen mahimo rang mokobra sa ilang financial assistance gikan sa mga automated teller machine (ATM) gamit ang ilang tagsa ka cash card.
Kadtong 1,287 ka senior citizens nga gi-process pa ang ilang mga ATM cash card adto lang una mokuha sa ilang aid sa gym o tunghaan.