TUNGOD sa pagluag na sa kuwarentina nunot sa pag-ubos sa alert level batok sa Covid-19, napanglantawan sa kapulisan sa dakbayan sa Sugbo ang bagang duot sa mga deboto nga mohugpa sa mga relihiyusong kalihokan sa simbahan human gi-ban kini sa miaging duha ka mga tuig tungod sa pandemiya.
Si Police Lieutenant Colonel Wilbert Parilla, deputy director for operations sa Cebu City Police Office (CCPO), nibutyag nga gipangandaman na ang nagsingabot nga Semana Santa.
Matud ni Parilla, unang higayon kini human sa duha ka tuig hinungdan nga modagsa ang daghang mga tawo sa simbahan aron pagpasalamat usab nga nakalabang sa hulga sa virus ug ubang kasinatian sa sama sa bagyong Odette.
Sagad sa mga kalihokan mao ang Bendita sa Lukay, Bisita Iglesia, Sugat, prosisyon sa pagkamatay ug pagka banhaw sa Ginoo ug uban pang mga kalihukan.
“We have already prepared, atoang mga personnel atoa na nga giandam. Usually we already have the template because that is already a yearly activity. And then duna na tay templates sa mga deployment sa atong mga personnel,” matod ni Parilla.
“Sa pagkakaron, we are expecting nga daghang mga tawo considering nga for the last two years, karon pa giusab og balik nga gi-allow sukad sa pagsugod sa pandemic. We are expecting nga modaghan ang tawo that is why we need to focus more on personnel deployment,” dugang niya.
Ang Semana Santa magsugod sa Abril 10 hangtud sa 16 ning tuiga.
Nasayran nga niadtong Marso 4, 2022, si Cebu City Mayor Michael Rama nipadayag nga uyon siya nga ibalik na ang naandang kalihukan sa Semana Santa human sa grabe nga pagkunhod sa mga kaso sa coronavirus disease 2019 (Covid-19) sa dakbayan.
Gawas sa Semana Santa, nagsingabot na ang eleksyon karong Mayo 9, 2022.
Gipanglantawan na daan sa CCPO nga usa ka hagit alang kanila ang hugot nga pagbantay sa seguridad sa siyudad ilabi nga dili layo nga dunay mga kandidato sa kaulohan nga modalikyat usab atol sa Semana Santa.
“Dako sad na siya kaayo nga hagit considering nga it might be naay personalities nga moabot coming from the national nato nga mga politicians. So, mao nay usa sa mga hagit nga atoang pangandaman,” matod ni Parilla.
Gipasabot hinuon ni Parilla nga kinahanglan nila nga doblehon pa ang ilang buluhaton sa pagpangandam.
Kon sa hisgutanan nga duna bay ikasarang ang CCPO sa paghatag sa mga tahas sa ilang kapulisan, matod ni Parilla nga ang CCPO mohangyo kon ugaling nagkinahanglan og dugang personnel gikan sa rehiyonal nga buhatan.
Sa kasamtangan si Parilla wa pay insakto nga ihap sa ilang mga personnel kon pila gyud ang ma-deploy niini sa nagsingabot nga Semana Santa.