PITO ang nangaangol, lakip ang usa ka 7 anyos, human nahagbong ang multicab sa pangpang sa Barangay Talayong, lungsod sa Badian, alas 7:45 sa gabii, Huwebes, Marso 10.
Nangaangol sila si Dionesio Español Sotomayor, 58, minyo, drayber,taga Barangay Malhiao, Badian; Margarita Ricaplaza Sotomayor, 49, asawa sa drayber; Agnes Elguerra Davin, 41, minyo, taga Brgy. Campangga, lungsod sa Barili; Earl Gian Elguerra Davin, 7 ; Erica Faith Elguerra Davin,19; Jomar Bayno Pesalbon, 21, taga Brgy. Santa Cruz, lungsod sa Ronda; ug Rosalinda Davin Villahermosa, 42, minyo, taga Brgy. Santa Cruz, Ronda.
Si Police Corporal Norman Aparre, imbestigador sa Badian Police Station nga nahinabi sa Superbalita Cebu, nagkanayon nga ang mga biktima sakay sa Suzuki multicab nga gimaniho ni Sotomayor.
Apan sa pagtungas sa subidahong karsada, wala masulod sa permira nga kambiyada ug kalit nga napawong ang makina sa multicab hinungdang niatras, nahagbong sa pangpang nga may gilawmon nga 15 ka tiil.
Ang mga biktima nga naratol niadtong higayuna nadala sa pagkahagbong sa multicab nga nalimbuwad. Nakaangkon silag mga kadaot sa kalawasan.
Nagawas na hinuon sa tambalanan, gawas lang ni Villahermosa, kinsa gibalhin sa ospital sa dakbayan sa Sugbo.
Matud ni Aparre, ang mga biktima manglimpiyo unta sa panimalay sa pamilya nga Sotomayor sa Talayong, Badian.
Manglimpiyo sila kay adto nila isaulog ang birthday sa apo sa drayber sa multicab.
“Duol nalang kaayo sa panimalay nila unya tungason man kaayo, napawong ang makina, sa ka kalit, mitras nalahos sila sa ubos,” dugang ni Aparre.
Ang 7 anyos nga bata nakaangkon lang og minor nga garas atol sa insidente.