NASUTA sa imbestigasyon sa Cebu City Police Office (CCPO) nga ang killer nga nipusil sa usa ka hamtong nga lalake niadtong Huwebes sa alas 7 sa gabii, Marso 10, sa sityo Viking, Barangay Mambaling, Dakbayan sa Sugbo, mao ra say nipatay sa tulo ka gikatahapang mga durugista sa dapit.
Mao kini ang gibutyag ni Police Lieutenant Colonel Wilbert Parilla, deputy director for operations sa CCPO, sa mga tigbalita sa Biyernes, Marso 11.
Kini human gipusil si Ohashnuhara Lipang Villahermosa, 56, taga Sityo Viking, Barangay Mambaling samtang siya naglakaw padulong mopauli sa ilang balay sa Huwebes sa gabii.
Duol na lang unta sa ilang balay si Villahermosa dihang gipusil siya sa nag-inusarang gunman. Patay na siyang niabot sa tambalanan.
Nakaangkon si Villahermosa og mga samad sa iyang tuo ug wala nga dughan.
Ang gunman yano rang nilakaw human sa pagpusil.
Samtang ang mga sakop sa Scene of the Crime Operatives (Soco) nakakuha og upat ka mga kabhang sa bala sa wala matino nga armas.
Si Parilla nibutyag nga sa imbestigasyon sa Mambaling Police Station, ilang nailhan ang mamumuno ni Villahermosa.
“The have already identified the suspect. The same personality in the previous incident, dunay kalambigitan kining suspek sa previous incident,” matod ni Parilla.
Ang gunman nalambigit sa illegal drugs, dugang ni Parilla.
Matud niya nga ang Mambaling Police nangita na sa gunman ug ilang dalion ang pagpasaka og kaso sa korte ug malutsan og warrant of arrest ang gunman.
“As to the victim wala man nalambigit sa drugas so it might be personal grudge kay ang atong biktima naghatag og information, dako na siya nga posibilidad nga maoy hinungdan,” dugang ni Parilla.
Nagtuo si Parilla nga ang gunman dunay amo nga durugista kay ang unang tulo nga gipamatay sa dapit gidudahang mga durugista.
Si Police Senior Master Sergeant Anthony Adizas sa Mambaling police, imbestigador, nibutyag nga ilang gitrabaho karon ang pag kombinse sa nakasaksi sa pagpusil kang Villahermosa sa pagluwat og pinanumpaang pamahayag nga gamiton sa pagkiha.
Si Police Major Dindo Juanito Alaras, hepe sa Mambaling Police Station, nikompirmar nga subay sa ilang pagsusi, ang killer ni Villahermosa ug ang nibira sa laing tulo ka mga tawo nga gipamatay sa Mambaling bag-ohay lang, usa ra.
Apan wa nganli ni Alaras ang suspek ug ang unang tulo ka mga biktima kay nagpadayon ang ilang operasyon.