DUHA ka mga drug den ang gipangbungkag sa mga ahente sa Philippine Drug Enforcement Agency (PDEA) 7 atol sa anti illegal drug operations sa Barangay Calamba ug Labangon, Dakbayan sa Sugbo sa Huwebes, Marso 10, 2022.
Sa unang ronda sa Barangay Calamba, pasado alas 2:00 sa hapon sa Huwebes, walo ka gikatahapang mga durugista ang nadakpan.
Napusasan sila si Marlon Langgaman, 47, giingong nagmintinar sa drug den; Earl Kerbee Manila, 28 construction worker; Maricar Caballero, 25, waitress; Cheryl Donayre, 23, walay trabaho; Cherrymae Gulfan, 26,vendor; Ericnaldo Cuizon, 48, walay trabaho; Aldous Perez, 46, construction worker; ug Archie Ursal, 24, water boy.
Nasakmit nga shabu moabot og P74,000 subay sa street value.
IKADUHA
Samtang sa alas 11:45 sa gabii sa samang adlaw, dugang upat ang nadakpan sa laing hugna sa ronda sa mga ahente sa PDEA 7 sa laing operating team sa Sityo Mancao, Barangay Labangon.
Mga dinakpan nailhan nga sila si Jonard Calapini, 30, giingong nagbantay sa drug den; Welner Lucero, 23, barbero; John Paul Del Abella, 25, walay trabaho ug; Kenneth Autentico, 23.
Mokabat sa 10 gramos sa gidudahang shabu ang nasakmit nga mobalor og P68,000 subay sa street value.
Ang tigpamaba sa PDEA 7 Leia Alcantara niingon nga ang unang drug bust sa Barangay Calamba gi-monitor sulod sa duha ka mga semana samtang ang sa Barangay Labangon sa milabay pa nga tuig nila gisugdan.