GIINGONG sakop sa Lahug drug syndicate ang nadakpan sa gihimo'ng buy-bust sa mga ahente sa Philippine Drug Enforcement Agency sa Central Visayas (PDEA 7).
Si Leia Alcantara, tigpamaba sa PDEA 7, niila sa dinakpan nga si Rey Anthony Amandoron, hamtong ang panuigon og molupyo sa Sityo Son-uc, Barangay Lahug ning siyudad sa Sugbo.
Si Amandoron nga giingong nalakip sa drug watchlist sa PDEA 7, nasakmitan ug duha ka pakete sa gidudahang shabu.
Si Amandoron, kinsa walay trabaho sa kasamtangan, nadakpan usab kaniadto sa susamang kaso apan naka-piyansa.
Sa dihang gikuhaan sa iyang habig, si Amandoron wala moangkon nga iya kadto'ng nakuha nga ilegal nga drugas gikan kaniya.
Samtang ang apohan sa suspetsado nga nagtrabaho sa barangay hall perting tiyabaw pagkahibalo niya nga iya diay'ng apohan ang gidakop dihang mikuyog siya sa barangay konsehal sa lugar kon asa ang dakop.
Matud sa apohan nga dili siya makatuo nga sa iyang apo kadtong nasakmit nga ginadiling drugas sanglit wa man kiniy kwarta og gani siya pa ang tighatud og pagkaon niini. (BBT, TPT)