Nothing has been cast in the stone yet, pero dili halayo ang posibilidad nga makaaway si Donnie “Ahas” Nietes alang sa world title fight sa Abril karong tuiga.
Ang nakanindot kay posibling ang iyang makontra mao ang kasamtangang world Boxing Organization (WBO) superfly champion nga si Kazuto Ioka sa Japan kinsa iya nang napildi niadtong Disyembre 31, 2018.
Kining maong senaryo mitumaw human mapildi ug matangtangi sa iyang titulo si kanhi International Boxing Federation (IBF) super flyweight king Jerwin Ancajas niadtong Pebrero 27 sa challenger nga si Fernando Martinez.
Si Ancajas, sa dihang wala pa kini malabnihi sa bakus, gikatakda unta nga moaway ni Ioka alang sa unification title bout apan tungod sa iyang kapildihan natunaw ang maong laraw.
Sa pagkapukan ni Ancajas, si Nietes misaka ngadto sa no. 1 position sa WBO superfly ranking ug mao na karon ang mandatory challenger ni Ioka.
Sa kasamtangan, naghuwat na lang ang kampo ni Nietes nga imando sa WBO ang mandatory defense ni Ioka, ug ning higayona, batok ni Nietes isip challenger.
Kon sa una, si Nietes maoy midepensa sa iyang titulo batok ni Ioka, karon nabali na kay ang lumad nga taga Murcia, Negros Occidental mao na man ang challenger.
Kon kahinumdoman, pipila ka buwan human mapildi ni Nietes si Ioka, gibuhian ra usab dayon niya ang titulo - aron paghatag og kahigayonan sa laing Pinoy fighter nga si Aston Palicte nga maoy makahupot sa maong bakus.
Apan napildi si Palicte ni Ioka sa ilang inilogay sa nabakanting titulo nga gibuhian ni Nietes.
Giangkon sa 39-anyos nga Nietes (43-1-6, 23 KOs) nga nagbasol siya nga iyang gibuhian ang bakus.
Iyang gisaad nga dili na kini mahitabo pa kon buligan sa kahigayonan nga makuha kini niya og balik.
Gibutyag ni Nietes nga wa siya mabalaka sa iyang timbang karon kay nagpadayon man ang iyang ensayo.
Subli niyang gipadayag nga interesado gyud unta siya nga maaway ang sikat nga si Roman “Chokolatito” Gonzales sa Mexico apan kuli na kining mahitabo sanglit gikataho nga mosaka man sa iyang timbang si Gonzales ngadto sa 118 lbs.
Samtang si Nietes, sa iyang bahin, walay planong mosaka ngadto sa bantamweight division ug matod niya nga magpabilin siya sa 115 lbs. kun superflyweight division.
Sa iyang edad karon nga 39-anyos, daw og sa way pagbahar ang kahanas ni Nietes.
Ang wa niya pag-away og kapin sa duha ka tuig (2019-2021), nakatabang sa iyang kondisyon kay nakapahuway man siya og sakto.
Sa paghibalik niya og away niadtong Abril 2021, nakapakita gihapon kini sa iyang kalantip ug yanong mipukan ni Pablo Carillo pinaagi sa unanimous decision.
Sa uwahi niyang away niadtong Disyembre 2021 didto sa Dubai batok ni Norbelto Jimenez, misangko man tuod kini sa panagtabla apan daghang kilay ang misaka ug nakontrobersiya ang maong desisyon kay klaro ug tataw man gyud nga si Nietes maoy midominar sa panagsangka.
Pero gidawat na lang ni Nietes ang maong desisyon ug ang anaa karon sa iyang alimpatakan mao nga mahatagan na usab siya og kahigayonan nga makaaway alang sa world title. Hopefully, kon dili sa Abril basta karong tuiga.
* * *
Ako lay gihilasan niining Philippine Athletics Track and Field Association (Patafa) nga gipangulohan ni Philip Ella Juico sa dihang ilang gipahibawo nga motabang sila sa Ukraine.
Kini isip pagsanong sa hangyo ni Sergey Bubka, ang president sa National Olympic Committee sa Ukraine ug Vice-President of World Athletics.
Dili kay supak ta sa ilang pagtabang ngadto sa Ukraine kay nagkinahanglan man gyud, pero sa dihang ang atong pole vault star nga si EJ Obiena nihangyo nga magpa-endorse sa Patafa aron makasalmot sa mga international competitions,wa gyud nila hatagig endorsement.
Unsa man maayo lang mo kon langyaw maoy mangayo og tabang ninyo kay aksiyon agad dayon, pero nia nuoy atong kaugalingong igsuon nga nagkinahanglan sa inyong endorsement inyo lang ibaliwala.
Pagkatoytoy. (jun.migallen22@gmail.com)