Tungod sa bukog sa manok, rambol niulbo sa usa ka imnanan sa dakbayan sa Talisay sa Biyernes sa alas 12 sa kaadlawon, Marso 11, 2022.
Unom ka mga batan-ong lalaki, usa kanila menor, gikasukmagay sa gibana-banang 20 ka mga lalaki dihang nagkomprontase kalabot sa bukog sa fried chicken nga gibutang sa lamesa sa usa sa mga grupo sulod sa Southscape sa Barangay Lawaan 1.
Matod ni Patrolman Joehmark Ocso, desk officer sa Talisay City Police Station nga nahinabi sa Superbalita Cebu, usa ka Adrian Cabrillos, 21, taga Barangay Lagtang, dakbayan sa Talisay, nireklamo batok sa grupo nga giingong nagtinabangay sa pagkulata kanila.
Iyang giila ang usa sa mga nangulata kanila nga si Charles Toribio, 18, taga sityo Candaya, Brgy. Mojon sa nahisgutang dakbayan, matod ni Ocso.
Si Jun (di tinuod nga ngan gipugngan tungod sa hangyo), niingon nga usa sa mga lalaki sa pikas lamesa niduol kanila ug nibutang og mga bukog sa manok sa ilang lamesa aron ilang masumsoman.
“Akong giingnan nga ayaw ana, Dol, kay di man mi mga iro. Insulto man na,” matod ni Jun sa interbyu sa Superbalita Cebu.
Kalit lang siyang gisukmag ug nahitabo na ang lamoklamok kay ang mga kauban sa mao nga lalaki diha na diay duol sa ilang lamesa nag-atang sa ilang reaksyon.
Matod ni Jun nga gisukmag, gibunalan siya og botelya sa ilimnong makahubog ingon man lingkuranan.
Duna siyay mga bun-og sa buko-buko, lawas ug iyang ngabil.
Human siya maigo sa baba, natumba siya ug nikamang una pa siya nawad-an sa panimuot.
Sa ilang paggawas sa imnanan, nag-atang na sab ang grupo, nga niadtong higayuna wa pa silay nailhan bisan usa.
Usban na usab unta sila, apan naluwas sila sa duha ka mga pulis nga ningresponde hinungdan nga nanagan ang grupo nga ilang gikaaway.
Ang Facebook post sa video sa rambol nakatabang kanila sa pag-ila sa unom sa ilang gikaengkwentro nga maoy ilang pasakaan og kaso.
Ang usa niini iyang kauban sa fraternity.
Si Mae, inahan sa usa sa mga nakulatahan ug nihangyo nga di nganlan alang sa seguridad, niingon nga di nila palabyon kining mao nga hitabo kay di siya makaako nga magtan-aw sa kahimtang sa iyang anak ug mga pag-umangkon.
Matod niya nga sa iyang nakita sa video, di 14 ra ang naengkwentro sa iyang anak ug mga pag-umangkon.
Usa sa iyang mga pag-umangkon gitabangan og lima samtang ang lain gitabangan og unom.
Upat usab ang nagtinabangay sa pagkulata sa iyang anak samtang daghan pa ang nagtinabangay pagkulata sa laing duha ka mga kauban.
“Di gyud to 14 ra ka buok. Mas motuo ko og at least 20 tong gidaghanona,” matod ni Mae sa interbyu sa Superbalita Cebu.
Nanawagan siya sa kagamhanan nga matabangan sila nga makab-ot ang hustisya sa gibuhat sa grupo ngadto sa iyang anak ug mga pag-umangkon nga pwerteng bun-oga, usa niini dako kaayo og samad sa ulo human bunali og botelya.
Matod ni Ocso nga ang imbestigador sa rambol magpaabot karong Lunes kon mopadayon ba sa pagpasaka og kaso ang grupo ni Cabrillos.
Si Mayor Gerald Anthony “Samsam” Gullas nga nakakita sa video nimando sa kapulisan sa pag-imbestigar og maayo sa hitabo.
“ I have already ordered Lt. Col. Randy Caballes, our police chief, to investigate the matter and if necessary, file charges against those involved,” matod sa mayor.
Iyang gikondenar ang hitabo kay nakadisturbo kini sa kahapsay ug kalinaw sa siyudad. (REV)