MOKANTIDAD sa P1.5 milyon nga gituohang shabu ang nasakmit sa mga elemento sa Philippine Drug Enforcement Agency (PDEA)-Davao, uban sa National Bureau of Investigation-Semro-Davao atol sa buy-bust operation alas 2:30 sa hapon, Marso 12, 2022, didto sa Pag-asa Street, S.I.R. Phase 2, Barangay 76-A, Davao City.
Sumala sa PDEA-Davao nga ang suspek nga si alyas Instik, 24-anyos, taga Madapo Hills, Barangay 5-A Bankerohan, Davao City, usa ka high-value target (HVT).
Human nga nakadawat og report ang awtoridad pinaagi sa kasaligan nga impormante, gilayong gikasa ang usa ka buy-bust operation.
Malampusong nasikop ang suspek diin gawas sa usa ka pakite nga gibaligya niini, nakuhaan pa kini og laing mga sinako nga pakite sa gituohang shabu nga ang tanan dunay street value nga P1.5 milyon nga gisulod sa mga rubber nga alang sa sapatos.
Nakatakdang kasohan ang suspek didto sa korte karong adlawa sa kalapasan sa Republic Act 9165 kun Comprehensive Dangerous Drugs Act of 2002.