DI KO makatuo sa nag-una nga balita sa SunStar Cebu kagahapon nga dunay kapin pa sa 5,300 nga magtutudlo sa mga tunghaan-publiko dinhi sa Central Visayas nga wala magpabakuna batok sa Covid-19 tungod sa mga rason nga katuhoan-dili.
Nakahoman ko sa akong elementarya ug high school sa publiko nga tunghaan didto sa among lungsod sa Cagwait, Surigao del Sur. Nagadako ko nga akong gitamod ug gitahod ang mga magtutudlo ug akong giisip nga modelo. Dako na ang kausaban sa panahon karon kay ang mga magtutudlo na hinuon ang nagpakita sa di maayo nga sumbanan.
Kining kapin sa 5,300 ka magtutudlo nga wala magpabakuna batok sa Covid-19, alang kanako, dili angayan nga motudlo pa kay wala silay ikapakita nga maayo nga pamatasan nga angayan sundon sa mga bata nga ilang gitudloan. Di ko makatuo ni DepEd 7 Regional Director Salustiano Jimenez nga iya gihapon pasudlon sa trabaho ning wala mabakunahi nga mga magtutudlo.
Kining pagsupak sa mga magtutudlo sa mando ni Presidente Rodrigo Duterte nga magpabakuna aron mahibalik ang face-to-face classes, usa ni ka sagpa sa kasamtangan nga administrasyon ug sa sekretarya sa Department of Education (DepEd).
Dako ni nga insulto sa administrasyon ni Presidente Digong, nga naningkamot nga makakuha og donasyon nga bakuna gikan sa mga dagkong nasud ug nagpalit pa gyud aron lang nga kitang tanan mabakunahan aron mapugngan ang pagkuyanap sa takod sa virus. Apan niay mga magtutudlo nga wa magpabakuna tungod sa ilang hiwi nga pagtuo.
Mora sad sa akong tan-aw nga nagpakita og hilas ning mga magtutudlo nga dili magpabakuna tungod kay motapos na man ang termino ni Presidente Duterte sa Hunyo ighoman sa piliay sa Mayo 9, 2022 ug wala nay poder ang Presidente ug si DepEd Secretary Leonor Briones ig-abot sa buwan sa Hulyo.
Hinuon, makagasto og dako ning wala magpabakuna nga magtutudlo tungod kay nagmando man si DepEd 7 Regional Director Jimenez nga kinahanglan duna silay ipakita nga negative result sa RT-PCR test matag duha sa semana. Nagpasabot ni nga daghan og kwarta ning mga magtutudlo kay mas gusto man nila mobayad sa antigen test kaysa libre nga bakuna sa Pfizer, AstraZeneca, Moderna, Sinovac ug Sinopharm.
Luoy ang mga estudyante nga ang ilang magtutudlo dili bakunado kay isingit sila sa section nga ang magtutudlo bakunado. Sa ato pa, maghuot na hinuon ang usa ka classroom ani Director Jimenez? Nakasupak na hinuon mo sa minimum health protocol sa physical distancing.
Ang gipasunod nga mando ni Director Jimenez sa mga magtutudlo nga dili bakunado mora man lang og kusi sa bogan, sa komedya pa, kay iya man gihapon pasudlon sa trabaho bisan og dili makatudlo sa mga estudyante. Mosabot man ta sa kalisud sa panahon karon, apan angayan unta na sila nga suspensohon hangtud nga mabakunahan.
Tinuod, makagasto ning mga magtutudlo nga dili bakunado tungod sa antigen test matag duha ka semana. Apan makabayad ni sila kay barato na ang RT-PCR test dili sama kaniadto nga P7,000 ang presyo.