GIPADAYAG ni Philippine boxing legend Manny Pacquiao ang dako niyang garbo human nidaog ang iyang kinamaguwangang anak nga si Jimuel sa labing unang away niini isip usa ka amateur fighter.
Si Jimuel nidominar sa iyang kontra nga si Andres Rosales aron pagrehistro og desisyon nga kadaugan sa ilang away niadtong Marso 13, 2022 (RP time) sa House of Fights sa San Diego, California.
Taodtaod sab nga nag-training si Jimuel sa Wild Card gym ni Freddie Roach una kini nihamag sa labing una niyang tahas.
“Congratulations to my son Emmanuel Pacquiao Jr. on fighting and winning his first U.S. amateur fight at junior welterweight!” post ni Pacquiao sa social media.
“I’m so proud of you.”
Kahinumdoman nga dakong supak ang Pambansang Kamao ng Pilipinas ug ang asawa niini nga si Jinkee nga magboksidor ang ilang labing unang anak.
Apan pursigido si Jimuel ug wala na’y nahimo ang iyang bantugang mga ginikanan kon dili sa pag-uyon.
Ning puntoha, wala pa masayri kon adunay plano si Jimuel nga mosalmot og qualification event alang sa 2024 Olympics.