GIPAUBOS na ang atong dakbayan sa Level 1. Buot ipasabot, daghan nang puwedeng mahimo nato nga dili nato mabuhat sa milabay'ng duha ka tuig. Puwede na magsuroy sa malls ang mga bata basta magtaptap lang gihapon og face mask. Gitugtan na sab ang panagtapok sa daghang tawo.
Niadtong niaging semana, gipahigayon ang usa ka National Directorate Meeting sa usa ka nasudnong partido sa hotel sa may Diversion Road ug sobra 100 ang partisipante.
Ang kadaghanan nalipay tungod kay karon pa sila naka-face-to-face nga panagtigum. Nalipay sab ang mga negusyante kay sa katapusan makabawi na sila sa hinayhinay.
Dili ikalimod nga ang "tourism industry" ang usa sa mga naigo sa Covid-19 pandemic. Hasta ang mga drayber sa PUJ nangalipay sab kay medyo nidako na ang ilang kita. Mao nagpasuwabi na sab og pasakay ang ubang drayber og pasahero. Ang kanhi tag-5 ra matag lingkuranan karon nibalik na'g tag-9. Di sab molarga ang sakyanan kung di mapuno, dili sama sa may pandemya nga bisan katunga ra ang sakay molarga na.
Ang nakaparat lang kay hastang mahala sa presyo sa lana tungod sa giyera karon sa Russia ug Ukraine. Dako nga porsiyento sa lana sa tibuok kalibutan gikan sa Russia mao nga daghang nasud nga maapektohan kung dunay giyera didtong dapita.
Dunay nag-ingon nga sad-an ang Russia sa pagpasiugda sa giyera, samtang ang uban nag-istorya sab nga sad-an ang Ukraine nganong moapil sila sa North Atlantic Treaty Organization (Nato) nga kontra man kini sa Russia.
May nagsulti nga sad-an niini ang Ustados Unidos kay nagsulsol kini sa Ukraine nga moanib sa Nato nga gikasuko sa Russia.
Ang resulta mao ang paglalin sa minilyon nga residente sa maong nasud, magkaguba sa mga nindot nilang lugar ug pagkahagsa sa ilang ekonomiya ug apil ta kay nisaka man ang presyo sa lana nga atong gigamit. Kung kinsa man ang sad-an, unta ang ilang lantawon mao ang kahimtang sa mga tawo nga way labot.
Kahibalo ra ba ta nga kung ang presyo sa lana na gani ang mosaka, seguradong mosaka sab dayon ang presyo sa halos tanang butang ning kalibutan.
Kanus-a pa kaha kini moubos ngadto sa P40-50 matag litro? Karon pa lang, nangayo na'g umento sa pamasahe ang mga drabyer. Nangayo sab og umento sa suholan ang mga trabahante ug tingali mosunod sab ang matrikula sa mga eskuwelahan.
Nibalik na usab ang pangutana nganong walay programa sa pagkalot og lana sa atong nasud? Gibalita kaniadto pa nga buhong ang atong nasud sa natural gas ug lana ilabi na dinhi sa Mindanao apan nganong walay seryuso ang programa ang gobyerno alang niini?
Anaa sab ang mga bag-ong teknolohiya sa enerhiya nga alternatibo sa lana apan wa gihapon kini gipakaylap sa atong gobyerno.
Ang sunod nga presidente ba kaha adunay ingon niini nga plano? Puwede kining ipangutana sa mga debate sa mga modagan nga kandidato kung unsay ilang plano sa pagtaas sa presyo sa lana sa kalibutan ug sa "renewable energy." Di na puwede ang pa-cute karong panahona.