NAGUBOT ang usa ka bar sa dakbayan sa Talisay human nagrambol ang duha ka mga grupo sa mga batan-on niadtong Biyernes sa kaadlawon. Kapin sa 10 batok sa 6 ang nagkombati. Way dag-anan ang unom nga mao pay giingong giunhan sa pagkulata.
Lima sa unom pwerteng bun-oga, usa kanila nakuyapan sa kasakit human siya tabangi og sukmag ug bunali og bangko.
Sa imbestigasyon sa kapulisan nga gimandoan ni Mayor Gerald Anthony “Samsam” Gullas sa pagkiha, nitumaw nga siyam ang mapasakaan og kaso, tulo kanila mga menor edad. Apan giapil usab ang unom ka batan-on kay nakaguba sila og mga butang.
Ang rambol sa Talisay gitubag og laing kombati sa mga batan-ong lalaki sa dakbayan sa Sugbo nga nahitabo sulod sa usa ka imnanan sa Brgy. Lahug. Ang rambol niabot sa karsada.
Tungod sa duha ka mga rambol, daghan sa netizens ang gustong ibalik ang curfew. Ilang gibasol ang paglibkas sa curfew sa nahitabong mga rambol.
Sa siyam nga ikiha sa kapulisay sa Talisay, tulo kanila mga menor. Nganong nakasulod man ang mga menor sa imnanan? Di ba ni kapakyas sa establisemento sa pagsusi kon mga menor o di ang nanulod? Matino unta ang tanang nanulod, labina niadtong kadudahan ang edad, pinaagi sa pagpakita og identification (ID) card. Ang di makapresentar ug kadtong masuta nga menor, di pasudlon.
Apan kuli kaayo nga ibalik sa local officials ang curfew kay ang paglibkas niini maoy pagbuhi og balik sa negusyo, labina sa mga kan-anan ug imnanan nga nahikawan sa limitadong oras sa pagbukas sukad sa pandemic niadtong Marso 2020. Kadaghanan kanila nanira kay unsa may ibayad sa abangan kon way kita? Nakabukas man tuod pagbalik ang uban, apan nanira na sab tungod sa pagsaka sa quarantine restrictions.
Kon di ibalik ang curfew, pahugtan usab unta og maayo kapulisan ug mga barangay ang seguridad sa mga night spot.