15 sa nagrambol gikiha sa pulis

Police Lt. Col. Randy Caballes, hepe sa Talisay City Police Station (File photo: City of Talisay Traffic Operations & Development Authority's Facebook)
Police Lt. Col. Randy Caballes, hepe sa Talisay City Police Station (File photo: City of Talisay Traffic Operations & Development Authority's Facebook)

Gipasaka na sa kapulisan sa Dakbayan sa Talisay sa Lunes, Marso 14, 2022 ang tulo ka mga kaso batok sa duha ka mga grupo sa mga batan-ong nalambigit sa karambola niadtong Biyernes sa kaadlawon, Marso 11, sa usa ka bar sa Barangay Lawaan 1.

Si Police Lt. Col. Randy Caballes, hepe sa Talisay City Police Station nga nahinabi sa Superbalita Cebu, niingon nga 15 ang ilang napasakaan og kasong alarm and scandal ug malicious mischief tungod sa namugnang kagubot sa Southscape.

Samtang wala pa mapasaka ang kasong physical injuries batok sa siyam, lakip sa duha ka mga menor, gumikan sa kakuwang sa mga dukometo sama sa medical certificates.

Sa 15, ang unom giilang sila si Charles Toribio, Gerald Regay, Alvin Cedeño, Frederick Indoy, Raven Franza ug Stephine Novo.

Ang unom gipasanginlang maoy nagsugod sa kagubot.

Ang grupo ni Toribio, 18, gireklamo sa grupo ni Adrian Cabrillos, 21, taga Brgy. Lagtang, Dakbayan sa Sugbo, nga nihatag kanila og mga bukog sa ilang lamisa.

Dihang ila kining gibadlong kay insulto ang ilang gibuhat kay di sila mga “iro,” giingong kalit silang gihamagan hinungdan sa rambol.

Ang rambol nakuhaan og video footage sa mga netizen nga gi-post dayon sa social media.

Nakita kini ni Mayor Gerald Anthony “Samsam” Gullas, kinsa nimando gilayon og imbestigasyon ug pasakaan og kaso kadtong nalambigit ug nagpasiugda sa kagubot.

Matod sa mayor nga di siya gustong ibalik sa pagpatuman ang curfew nga gilibkas na alang sa mga nagpanuigon og 18 anyos pataas.

Tubag usab kini ni Gullas sa panawagan sa netizens nga ibalik ang curfew aron di na masubli ang karambola.

Samtang lima sa unom sa grupo ni Cabrillos nakaangkon og mga samad ug bun-og.

Gusto nilang pasakaan og kaso ang mga nangulata kanila.

Usa sa ilang mga kauban nakuyapan human nasukmagan ug nabunalan og lingkuranan. Lakip sa nasamdan ang ilang menor nga kauban.

Matod sa grupo ni Cabrillos nga kon wa pa niabot ang duha ka mga pulis sa dakbayan sa Talisay, hayan makaduha sila nakulatahan kay giatangan sila sa gawas.

IPATAWAG

Tungod sa hitabo, si Caballes nagkanayon nga karong semanaha ilang gipatawag sa usa ka tigom ang mga restaurant, resto bar owner ug mga sakop sa Talisay City Licensing Office kabahin niini.

Iyang gusto nga mapahimangnoan pagbalik sa Kagamhanan sa Talisay City ang mga tag-iya sa resto bar ug restaurants sa ilang mga obligasyon, labi na sa pagdili sa mga menor nga makasulod sa ilang establisemento ug makapalit og ilimnong makahubog.

Gibutyag ni Caballes nga duna gihapoy curfew alang sa mga menor gikan sa alas 10 sa gabii hangtod sa alas 4 sa kaadlawon.

Gipadayag sa hepe nga sila sa kapulisan sagad nagpahigayon og roving sa mga lugar nga dunay kalingawan o imnanan aron masanta kon dunay motumaw nga kagubot o mahadlok ang dunay plano sa paghimo niini.

Matod ni Caballes nga hugot nilang ipatuman ang curfew alang sa mga menor aron di na masubli ang rambol.

Iya usab nga giawhag ang mga ginikanan sa pagdisiplina sa ilang mga anak ug sa pagtuman sa curfew isip ilang tampo sa komunidad.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph