Security guard nga nipusil patay sa iyang silingan nga babaye atol sa ilang lalis kalabot sa road right of way sa Lunes sa buntag, nitahan sa Compostela Police Station nianang alas 7 sa gabii, Marso 14, 2022.
Si Anthony Roca Ternate gikuyogan sa iyang pamilya ug barangay kapitan sa Poblacion sa iyang pagtahan dala ang .357 caliber revolver nga iyang gigamit sa pagpusil.
Sila si Anthony ug iyang asawa nga si Madelyn Ternate gikalalis labot sa ilang agianan ni Nina Lumbad Cadungog, 39, sa Lunes sa alas 6 sa buntag sa sityo Purok Hilltop, Barangay Canamucan, Compostela.
Nasuko ang magtiayong Ternate kang Cadungog kay gibutangan og mga tanom ang ilang agianan hinungdan nga nasangit ang ilang motorsiklo hinungdan sa ilang init nga panaglalis.
Taliwa sa ilang panaglalis, nikuha og armas sa ilang balay si Anthony ug nibalik, nipusil patay kang Cadungog, kinsa nangwaswas sa iyang mga linabhan sa gripo duol sa ilang balay.
Nieskapo si Anthony samtang si Madelyn gidakop sa kapulisan isip kunsabo sa pagpatay.
Matud ni Police Lieutenant Samuel Negro, hepe sa Compostela police, nga si Anthony nisulti kaniya nga nakonsensya siya sa iyang gibuhat.
Apan napuno na siya sa pagsige og yawyaw ni Cadungog hinungdan nga iyang napusilan.
“Grabi man daw kaayog baba ang biktima ratatat kon magyawyaw. Wala na siya kaagwanta, iyang napusilan,” dugang ni Negro.
Buhian usab nila ni Negro si Madelyn human nipirma og extra judicial confession si Anthony nga way labot ang iyang asawa sa pagpatay.