MOKANTIDAD sa P1.2 milyon sa pinaugang dahon sa marijuana ang nakumpiska sa Talomo Police Station atol sa buy-bust operation alas 9 sa gabii niadtong Marso 12, 2022 didto sa Purok San Vincente, Lote Street, Barangay Lizada, Toril District, Davao City.
Ang suspek giila ni Police Major Noel Villahermosa, hepe sa Talomo Police Station, nga si Mark Anthony (bansagon gitago) alyas Anton, 21-anyos, ug giilang anaa sa top list sa drug watchlist sa Davao Region.
Sumala ni Major Villahermosa nga nakadawat sila og impormasyon labot sa ilegal nga kalihukan sa suspek hinungdan nga ila dayon nga gikasa ang buy-bust operation.
Nakuha sa posisyon sa dinakpan ang mga pakite sa pinaugang dahon sa marijuana nga mokantidad og sobra P1.2 milyon.
Ang suspek gipasakaan na og kasong paglapas sa Republic Act 9165, kun Comprehensive Dangerous Drugs Act of 2002 didto sa korte.