Giawhag ni Puwersa ng Bayaning Atleta (PBA) Partylist Rep. Jericho Nograles ang Philippine Sports Commission (PSC) nga dili na mohatag og pundo sa Philippine Athletics Track and Field Association (PATAFA).
Kini gumikan sa desisyon sa Patafa nga dili iendorso ang pole vault Olympian sa Pilipinas nga si EJ Obiena sa nagkadaiyang international competitions lakip na niini ang umaabot nga World Indoor Championship sa Belgrade, Serbia.
Si Obeina, kinsa maoy kasamtangang world ranked No. 5, nibutyag pinaagi sa pag-post sa social media nga dili siya makasalmot sa Serbia event gumikan kay nibalibad ang Patafa pag-endorso kaniya.
“This action of Patafa only shows that its existence is not for the best interest of Philippine sports. The PSC should stop funding Patafa and direct all support to individual athletes,” pamahayag ni Nograles nga napatik sa www.abs-cbnnews.com.
“Patafa has lost all the moral right to represent the Philippines as an NSA because of its action against Obiena. We are just wasting taxpayers’ money on Patafa.”
Dayag na sa publiko nga taodtaod na sab nga nagbikil sila si Obiena ug PATAFA president Philip Ella Juico.
Nagdugkat sa panagbikil mao ang pasangil ni Juico nga nagpasagad og gamit si Obiena sa pundo nga gitagana alang sa iyang training dihang nangandam pa siya alang sa miaging Tokyo Olympics.