Mga duwa karon
3:00 pm- Alaska
batok NLEX
6:00 pm- Ginebra
batok TNT
Sugdan karong hapon ang quarter-final round sa Philippine Basketball Association (PBA) Governor’s Cup conference sa Smart Araneta Coliseum.
Sa main game, ang No. 3 TNT Tropang Giga makigbatok sa No. 6 ug defending champions nga mao ang Brgy. Ginebra Gin Kings karong alas 6:00 sa hapon.
Sa premirong duwa, ang No. 2 NLEX Road Warriors makigsangka sa No. 7 Alaska Aces karong alas 3:00 sa hapon.
Isip benepisyo sa mas taas nila og puwesto human sa elimination round, ang Tropang Giga ug Road Warriors naggunit og twice-to-beat nga bintaha ning maong panagparang.
Nagpasabot kini nga makaderetso sila sa semi-finals kon modaog sila ning adlawa.
Apan labing seguro, dili basta-basta motugot niini ang Gin Kings ug Aces.
Ang Gin Kings determinadong modepensa sa ilang titulo samtang ang Aces determinado sab nga magbawon og kalampusan sa ilang pagbiya.
Ang Aces nibutyag nang daan nga hingpit na silang mopahawa sa liga inig human ning maong komperensya.