Pulis nga nalambigit sa kamatayon sa managtiayong Baringui-an sa Sityo Tapok-tapok, Barangay Panadtaran, Lungsod sa San Fernando, Sugbo pabiling nagtago-tago.
Gibutyag ni Police Colonel Engelbert Soriano, direktor sa Cebu Police Provincial Office nga human napasaka ang kaso batok sa upat ka mga pulis nga nalambigit sa kamatayon nila ni Ma. Louela ug Peter Baringui-an niadtong Pebrero 13, pabiling wa motahan si Police Staff Sergeant Alvin Enad.
“He remains at large pero ang sa amin po ay hinihintay namin ang issuance ng warrant of arrest, if prosecutor finds sufficient evidence doon sa kaso,” matod ni Soriano.
Dugang niya nga ang kaso nga napasaka batok ni Enad, robbery with double homicide uban sa laing upat pa ka mga suspek nga pulis.
Sa sayo pa, base sa imbestigasyon, ang Police Regional Office (PRO)-7 niila sa mga pulis nga nalambigit sa krimen nga sila si Police Staff Sergeants Rene Abella Catamora nga nadestino sa Consolacion Police; Junrey Ypil - Danao City Police; ug Junrey Batobalonos - Lapu-Lapu City Police; ug na dismiss nga pulis nga si Esmeraldo Quillosa.
Gibutyag usab ni Soriano nga bisan pa man nga pabiling gawasnon si Enad, apan iya nang gipirmahan ang “forced-leave’ niini uban sa laing duha ka mga pulis nga nalambigit sa krimen nga nadestino sa CPPO.
Sa sayo pa, base sa extra-judicial confession ni Catamora, iyang gihinganlan si Enad nga maoy niplano sa pagtulis sa mga Baringui-an.