Labing unang Motorcycle Skills competition nga gipasiugdahan sa Police Advisory Council sa Mandaue City Police Office (MCPO) nagmalampuson.
Si Police Major Romeo Caacoy Jr., assistant force commander sa City Mobile Force Company sa MCPO, nibutyag nga niadtong Sabado, Marso 12, gihimo ang kompetisyon sa usa ka pribadong lugar sa Jamestown sa Mantawi Drive International sa dakbayan sa Mandaue.
Matud ni Caacoy nga dunay upat ka mga dibisyon ang competition nga naglangkob sa Law Enforcers, Tigers, Civilian ug Ladies Division.
Ang motorcycle competition giapilan sa 50 ka mga partisipante nga mahiligon sa pagmaneho sa motorsiklo nga nagagikan sa nagkalainlaing lugar sa Central Visayas.
Dugang ni Caacoy nga ang katuyoan niini mao ang luwas nga pagmaneho sa motorsiklo ingon man kon unsay mga angay nga buhaton kon magmaneho sa motorsiklo sa lisod nga mga agianan.