Ang Vape Bill nagpalig-on sa balaud batok sa mapasagaron nga pagpamaligya sa e-cigarettes.
Nagdili usab kini sa pagbaligya sa e-cigarettes nga dunay flavor descriptor nga makapadani sa mga batan-on, labina sa mga menor de edad.
Mao kini ang gitataw ni Kongresista Sharon Garin, chairperson sa House committee for economic affairs, sakop sab sa Vape Bill sa House bicameral panel.
Ang gitumbok nga balaud ni Garin mao ang Republic Act 11467, nga nag-amendar sa National Internal Revenue Code of 1997, nga nagpaumento sa excise taxes sa mga produktong alcohol, electronic cigarettes (e-cigarettes) ug uban pang mga produktong tabako.
Matod ni Garin nagpalig-on usab kini sa Executive Order 106 ni Presidente Rodrigo Duterte nga nagdili sa paggama, pagpakatap ug pagpamaligya sa di rehistrado ug sinagulan na nga e-cigarettes.
Si Garin niingon nga ang gihiusa nga House Bill 9007 ug Senate Bill 2239 nga mas naihan na nga Vape Bill estrikto ug dunay ngipon pinaagi sa pagpahamtang og bug-at nga mga silot sa mga makalapas.
Siya niingon nga ang mga balaud karon wa niini nga mga silot.
Matod niya nga ilang gihigpitan ang pagbaligya sa e-cigarettes nga dunay flavor aron di madani niini ang kabatan-onan.
Gidili usab ang pag-advertise niini nga makapadani sa mga menor de edad ug paggamit sulod sa simbahan ug mga building sa kagamhanan.
Gidasunan usab kini ni Kongresista Estrellita Suansing sa 1st district sa Nueva Ecija, kinsa health advocate.
Matod niya nga nasayod sila nga dunay mga kabalaka nga ang flavor sa e-cigarettes magamit sa pag-target sa mga menor de edad busa ila kining giestrikto og maayo.
Gipasabot ni Suansing nga ilang giseguro nga ang mga menor mapanalipdan, di mogamit og e-cigarettes, gawas sa mga hamtong nga gustong mobiya sa sigarilyo.