Usa ka drug den sa Sityo Punyang, Barangay Duljo Fatima, Siyudad sa Sugbo, gironda sa mga ahente sa Philippine Drug Enforcement Agency (PDEA) 7 sa Martes sa hapon, Marso 15, 2022.
Ila usab nga gidudahan nga ang drug den gihimo nga jerjeranan sa manggamitay og drugs kay dunay bakanteng duha ka mga kwarto nga dunay katre nga gipaabangan og tag P50.
Si IA 1 Jessie Cabutotan, team leader sa PDEA 7 ug nangu sa ronda, niingon nga ilang nasikop ang upat ka gikatahapang mga durugista, apil na ang pag-rescue sa usa ka menor de edad nga apo sa target.
Ang nadakpan nailhan nga sila si Moises Villañueva, 72, kanhi kargador sa Carbon Public Market ug target sa drug bust ug iyang anak sa unang asawa nga si Manolito Villañueva, 36; Mark Bargamento, 26, taga dakbayan sa Lapu-Lapu ug Jane Abelgas, 47, taga Tupas St., sa Barangay Sawang Calero, ning siyudad.
Usa ka alyas Blue, 17, na-rescue sa mga awtoridad.
Giangkon sa 17 anyos nga apil siya nga mogamit og ilegal nga drugas.
Nasakmit sa operasyon ang shabu nga mokabat og 11 gramos nga mobalor og P74,000 subay sa street value niini.
Ang tigpamaba sa PDEA 7 nga si Leia Alcantara nibutyag nga usa ka semana nga gimonitor ang balay ni Villanueva.
Pipila usab ka higayon nga sila naka test buy aron pagkompirmar sa impormasyon nga ilang nakuha.
Kalapasan sa Republic Act 9165 kun Comprehensive Dangerous Drugs Act of 2002 ang atubangon sa mga dinakpan.