Nangalumos ang managsuon sa dihang ang pumpboat nga ilang giluwanan natikyaob niadtong Lunes, Marso 14, duol na sa pantalan sa Barangay Poblacion, lungsod sa Sibonga, habagatang Sugbo.
Ang mga nangamatay giila nga sila si Recoy, 19, ug Adrian Casipong, 16, taga Barangay Kangdampas, lungsod sa Barili, lalawigan sa Sugbo.
Matod pa ni Police Staff Sgt. Roland Napire sa Sibonga Police Station nga ang managsuon kuyog niadtong higayona sa ilang maguwang nga si Jorge ug uyoan nga si Edgar Taladro.
Si Taladro maoy nagdala sa sakayan.
Nasayran sa Superbalita Cebu nga ang mga Casipong ningbakasyon sa balay sa ilang iyaan nga taga Sityo Suba Pandan, Barangay Poblacion, Sibonga.
Pipila na unta ka metros ang gilay-on aron nga modunggo sa pantalan sa Poblacion, Sibonga ang bangka, sa dihang gihampak sila og dagkong mga bawod resulta sa pagtikyaob sa sakayan.
Ang upat ka mga sakay sa pumpboat nangahulog sa dagat.
Apan sila si Adrian ug Recoy wa na makahaw-as sa ibabaw sa tubig, padayon nga ningtidlom tungod kay di sila kahibawo molangoy.
Mga rescuers sa Bureau of Fire Protection (BFP), Regional Mobile Force Battalion (RMFB) 7 ug Sibonga Police ningpahigayon og search and rescue operation sa managsuon.
Naabtan og tunga sa oras ang pagpangita sa managsuon gumikan sa dagkong bawod una sila nakaplagan.
Sa dihang sila nakuha ug nahaw-as gikan sa dagat, gidali sila sa pagdala sa tambalanan sa lungsod, apan gideklarar nga dead-on-arrival.