Patay ang drayber sa motorsiklo ug iyang angkas, kinsa nabuak ang ulo, human nalatayan og crane truck sa national highway sa Barangay Linao-Lipata, lungsod sa Minglanilla sa kagahapon, Marso 16, ala 1:40 sa kaadlawon, atubangan sa Shell Gas Station.
Gideklarar nga dead-on-arrival (DOA) sa Minglanilla District Hospital mao sila si Jesus Panlon Adolfo Jr., hingkod, tripolane sa usa ka inter-island vessel, taga Barangay Punay, Aloguinsan ug si Jinky Y. Concepcion, hingkod, trabahante sa CARD Inc., taga Barangay Magdugo, dakbayan sa Toledo.
Ang drayber sa crane truck giilang si Tomas Viader Bas, 55, minyo, taga Barangay Subangdaku, dakbayan sa Mandaue, gitanggong na sa police station sa Minglanilla.
Si Police Staff Sergeant Ernest Laspuña sa Minglanilla Police Station nibutyag nga ang mga biktima sakay sa ilang motorsiklo padulong mopauli sa Aloguinsan.
Pag-abot sa nahisgutang lugar, ni-overtake ang motorsiklo sa crane truck sa tuong habig sa karsada.
Apan gumikan sa kaapiki sa dan, nabangga kini sa gutter hinungdan sa pagkatumba sa motorsiklo ug nalatayan sila sa crane truck.
Si Major William Homoc, hepe sa Minglanilla Police Station nga nahinabi sa Superbalita Cebu, nagkanayon nga wala makabantay si Bas nga siya nakaligis og mga tawo.
Gipahibawo na lang siya sa mga residente sa dapit nga nakakita nga siya nakaligis.
Ang mga biktima naguroy pa og pipila ka metros dihang nalatayan sa crane truck.
Si Homoc nibutyag nga gipaabot pa nila ang pamilya nila ni Adolfo ug Concepcion alang sa pagpasaka og kasong reckless imprudence resulting to double homicide and damage to property.
Si Homoc subling niawhag sa mga motorista nga moagi sa nahisgutang lugar nga maghinayhinay sa ilang pagpadagan. /