PAIT ang panginabuhi, kini ang natuklod nga pasangil sa duha ka mga gituohang pusher nga nasikop sa kapulisan sa Toril Police Station atol sa gikasa nga buy-bust operation pasado alas 11 sa gabii, Marso 14, 2022, didto sa Purok-2, Bankas Heights, Toril District, Davao City.

Subay sa report sa Toril police ang duha ka nahisgutan nailhang sila alyas Koykoy, 36-anyos, taga Bago Gallera, Davao City, ug usa ka alyas Ariel, 42-anyos, nagpuyo sa Aplaya, Digos City.

Nadakpan ang duruha subay sa impormasyon nga gipaabot sa Toril police gikan sa nagpakabanang lungsuranon hinungdan nga gikasa ang buy-bust operation.

Ang duruha napalitan ug nakuhaan sa ilang posisyon og tulo ka pakite sa gituohang shabu nga mokantidad og P5,000.

Kasong pagsupak sa Republic Act 9165, kun Comprehensive Dangerous Drugs Act of 2002, ang gipasaka nga kaso batok sa mga dinakpan didto sa korte.