NAG-UNA si NorthPort Batang Pier guard Robert Bolick sa listahan sa mga kandidato alang sa inilugay sa Best Player of the Conference (BPC) award sa 2021 Philippine Basketball Association (PBA) Governors’ Cup.
Basi sa statistics nga gipagawas sa liga kagahapon, Marso 16, 2022, si Bolick nakatigom og 39.9 average statistical points (SPs) human sa elimination round diin nagbawon ang Batang Pier og 5-6 nga rekord.
Gipangulohan ni Bolick ang local players scoring pinaagi sa iyang 21.8 average hasta sa assists (8.8) ug steals (2.2) per contest.
Apan wala kini nagpasabot nga hayag na ang paglaom ni Bolick nga makuha ang labing una niyang BPC award gumikan kay napakyas man ang Batang Pier pagsulod sa quarter-finals.
Ang lig-ong mga kompetensya ni Bolick mao sila si Phoenix Super LPG Fuel Masters ace Matthew Wright (34.9 SPs), TNT Tropang Giga super rookie Mikey Williams (33.9 SPs) ug NLEX veteran Kevin Alas (33.55 SPs).