PAGDUMOT nga gihulipan sa gugma, pagkahiamgo sa sayop ug pagmahal sa banay maoy pipila sa mga pagtulun-an nga inyong mapupo sa short film nga “Kalbaryo ni Mario” nga haum ug tukma ning nag-angat ang Semana Santa.

Sa sinuwat ug direksyon sa multi-talented artist, pianist ug event host, Sam Costanilla, ang “Kalbaryo ni Mario” gi-produced sa Otadoy Films (Hon. Cyrus and Jessica Otadoy) ug gibituonan sa mga inila ug tinahod nga personalidad sa Sugbo.

Si Costanilla mao sab ang direktor sa “Mama Mayumi” nga nanghakot og mga pasidungog sa 2021 Gawad Sining Short Film Festival sa kaulohan. Kini mao ang Best Actor (Dan Lopez), Best Supporting Actress (Joan Flores), Best Music (Frinsloed Dahili), People’s Choice ug 3rd Best Film.

Si Dan Lopez mao sab ang bida karon sa “Kalbaryo ni Mario” nga maayo kaayong nidala sa papel nga biktima sa `bullying’ o dinaugdaog.

Gibituonan usab ni sa kanhi multi-awarded TV news anchor, singer, actor nga si Dante Luzon ug It’s Showtime’s Tawag ng Tanghalan Season 3 semi-finalist, Girlie Laspiñas nga nidala isip magtiayon ug mga ginikanan ni Mario.

Nikumpleto sa powerhouse cast mao silang Dr. Paulus Cañete, Decemay Padilla, Anne Balagas, Marj Borgonia, Alain Montesclaros, Eli Manlangit, Pedrito Patenio, Atty. Selwin Prada, Johar Lapasaran ug Dr. Tess Heyrosa.

Ang “Kalbaryo ni Mario” ipasalida sa Marso 26, Sabado, ug Abril 16 (replay) ug libreng ipasundayag via The Other Side of Me FB page ug YouTube.

Lain na usab ning obra nga teledrama nga siguradong mohilap sa kasingkasing sa mga Cebuano. Direk Sam Costanilla, Ssssuper Ka!

Unsay nakadasig nimo sa pagsuwat ani nga drama?

Gibasi nako kini sa matuod nga hitabo. Ang tema nga human sa grabeng pagdaugdaog sa usa ka maguwang ngadto sa iyang manghod, ang maguwang nakaamgo sa iyang sayop nga maoy nakadasig nako sa pagsulat sa script. It’s a story of hatred, bullying, family, love, reconciliation and forgiveness.

Unsay pinakalisud nimo nga na-encounter isip direktor?

Wala man hinuon ko maglisod kay puros man maayo moarte atubangan sa camera ang akong mga artista. Bisan ang mga first timers maayo kaayong midala sa ilang mga papel. Dili lisod kay dili man action genre kining salidaha.

Asa sad mo nag-shooting?

Ang locations sa Balay Kapitolyo nga kanhi East Capitol Pensionne, Lourdes Parish Church sa Punta Princesa ug balay sa banayng Villarojo sa Doña Esperanza Subdivision, Tisa.

Ikapila na ni nimong teledrama?

Ikawalo na kini nakong drama special o short film. Since 2016, duna gyud koy one Lenten teledrama matag tuig. Naa sab koy Christmas teledrama matag December.

Unsay sunod nimong proyekto?

Naa koy advocacy short film bahin sa LGBTQ+ community sa Sugbo. Apil niini sila si Atty. Regal Oliva (Mandaue City Treasurer), Engr. Junjet Primor, Victor Cuenco ug Margaux Frasco (igsuon ni Cong. Duke). Puros sila first timers sa natad sa acting. Shooting in April.

Mensahe nimo sa inyong kadaugan sa Gawad?

Bahin sa among lima ka awards sa Gawad Sining Film Festival, nalipay kaayo ko nga usa ako sa lima ka nominado sa Best Director category tungod sa akong project nga Mama Mayumi. Usa kini ka dungog ug garbo nga akong ipaambit sa tanang Sugboanon.