NIAWHAG sa kagamhanan si National Economic and Development Authority (Neda) Secretary Karl Kendrick Chua niadtong Martes, Marso 15, sa pagpatuman sa upat-ka-adlaw nga trabaho aron pagdaginot sa enerhiya ug pagpaalibyo sa epekto sa pagtaas sa presyo sa mga produkto sa petrolyo.
Si Chua nisulti kang Presidente Rodrigo Duterte atol sa Talk to the People Address nga ang Neda nagsuporta sa rekomendasyon sa Department of Finance (DOF) sa pagpabilin sa excise tax sa lana ug mohimo og “targeted relief” sa vulnerable sectors gikan sa taas nga value added tax (VAT) collections tungod sa pag-umento sa lana.
Si Duterte niaprubar sa rekomendasyon sa DOF kagahapon, Marso 16.
“Siguro subukan natin ‘yung conservation of energy at isa sa halimbawa dito ay ‘yung four-day workweek. Magta-trabaho pa rin po ang bawat Pilipino ng 40 hours per week pero imbes na sa limang araw, ay apat na araw. Imbes na walong oras, magiging sampung oras kada araw,” matud ni Chua.
Matud ni Chua, kini nga estratehiya gipatuman sa 1990s panahon sa Gulf War ug 2008, dihang taas usab ang umento sa lana.
“Ang epekto nito ay makakatipid din, imbes na araw-araw magko-commute, ay magiging apat na araw. Ito ay makakatulong din sa pag-manage ng ekonomiya natin,” dason niya.
Dunay panawagan karon sa nagkadaiyang sektor, apil na ang mga magbabalaud, sa pagsuspenso una sa excise tax sa lana tungod sa pagsige og saka niini ning nakalabay nga mga semana.
Ang labing dako niini nga umento gipatuman niadtong Martes, Marso 15, diin ang krudo nisaka og P12 kapin matag litro samtang P7 kapin sa gasolina.
Ang rekomendasyion ni Chua gisuportahan ni Energy Secretary Alfonso Cusi, kinsa nipasabot sa kaimportante sa pagpalapad sa work-from-home arrangements.
“We also support the panukala na four-day workweek at tsaka ‘yung panakula na palawigin muna natin ang work-from-home para sa ganon po mabawasan ang pagbiyahe ng ating mga mamamayan,” matud ni Cusi.
Daghang kompaniya ang nipatuman sa work-from-home arrangement sukad sa pasugod sa coronavirus disease 2019 (Covid-19) pandemic sa 2020.