NITAHOD ang pangulo sa Regional Intelligence Division (RID) 7, Police Colonel Glenn Mayam, sa hangyo sa mga food delivery rider nga dili magsul-ob og pareha sa ilang uniporme ang mga operatiba sa RID 7 sa pagtakuban sa ilang kaugalingon kon dunay himuon nga anti-illegal drug operations.
Si Mayam nagkanayon nga balido ang kabalaka sa riders nga nagbutang og risgo sa ilang kinabuhi ug nisaad nga iyang ipaneguro nga dili na kini masubli sa ilang umaabot nga mga operasyon.
Dugang ni Mayam nga kon unsay nadesisyonan sa Philippine Drug Enforcement Agency (PDEA) 7, sila motuman usab aron malikayan na ang mga negatibo o malikay sa disgrasya ang delivery riders panahon sa ilang trabaho.
Nasayran nga ang tigpamaba sa PDEA-7, Leia Alcantara, nakigtagbo sa management sa food delivery services aron mahisgutan kon unsay maayo nga mga lakang nga magtinabangay ang matag habig.
Alang kang Mayam, usa kini ka nindot nga lakang aron dunay koordinasyon hinungdan nga andam usab sila kon dunay panagtagbo sa iyang buhatan ug kadagkuan sa food delivery services.
Kahinumdoman nga sa nanglabay nga mga adlaw, ang grupo sa Cebu Food Rider Community niapilar sa mga tigpatuman sa balaud nga unta hunungon na ang pagsul-ob sa uniporme sa ilang delivery food services sa anti-illegal drug operations.
Kini makahatag og kadelikado sa ilang mga rider ilabi na sa ilang trabaho kay posible silang maalaan nga operatiba.
Matod ni Mayam nga nakasabot siya sa mga yangu-ngo sa mga rider tungod kay nanarbaho ug nagtuman lang sila sa ilang tahas sa paghatod og pagkaon.