KAPUYO sa big-time pusher nga nabilanggo sa Liloan Police Station gituhoan sa kapulisan nga maoy nagdala sa tulo ka mga pakete sa shabu nga giputos og brief niadtong Lunes, Marso 14, alas 5:00 sa hapon.
Si Maria Ann Lacasa Ferrer, 39, field coordinator sa kompaniya, taga Purok Acasia, Sitio San Lorenzo, Barangay Jubay, lungsod sa Liloan, gitanggong sa kapulisan human nasakpan ang shabu sa iyang gidala nga brief.
Si Police Major Ramil Morpos, hepe sa Liloan Police Station nga nahinabi sa Superbalita Cebu, nagkanayon nga si Ferrer nibisita sa iyang kapuyo nga si Angelito Paluyo Paronda, alyas Letlet, kinsa nadakpan sa buy-bust niadtong Sabado, Marso 12.
Nalakip si Paronda sa listahan sa kapulisan nga nalambigit sa illegal nga kalihukan.
Matud ni Morpos, pagbisita ni Ferrer, nagdala kini og sinena, short pants, brief ug mga pagkaon sa iyang kapuyo.
Dugang ni Morpos nga standard operating procedure (SOP) sa naka-duty nga jail officer nga moinspeksiyon sa gipangdala sa mga bisita sa mga binilanggo sa selda sa police station.
“So, gitagsa-tagsa sa pag-inspection. Unya katong brief naay bulsa sa may sakang, didto nakita-an ang tulo ka putos shabu,” dugang ni Morpos.
Gumikan niini, gipusasan si Ferrer, kinsa nanghimakak nga siyay nagdala sa ginadiling drugas.
Si Morpos nipasabot nga tataw kaayong gituyo sa pagpasulod ngadto sa brief ang tulo ka mga pakete sa shabu hinungdan nga nagtuo sila nga si Ferrer ang nagpalusot ug depensa lang niini ang paglimod.
Si Morpos nagkanayon nga 14 ka tuig na ang duha nagpuyo ug lisod usab tuohan ang sulti ni Ferrer nga wala siya masayod bahin sa shabu.
Ang drugas nitimbang sa 0.09.gramos nga mobalor sa P1,500.
Kasong paghupot sa illegal nga drugas ang ipasaka sa kapulisan batok kang Ferrer.